Popular Bible Verses from Matius 6

Share

Mewaliꞌ, to hangangaa ipohimpodulukei iomo Pueꞌ Ala meparenta i lali kotuwuꞌmi, hei hangangaa iwalikei nturusi hapo to mononto i pampeꞌeleNa. Ane iwalikei hatoꞌo, lekiꞌ-lekiꞌna to iparaluikei, bateꞌna hingkiꞌ Nopaꞌanikikei.

Mewaliꞌ, inioꞌ tepe lalimi mampekiri hapo to hingkiꞌ mewali i ando-ando to hingkiꞌ hupaꞌ. Ando hieꞌe ganaꞌmo komaporiꞌne, hampoliꞌmokei mampekiri hapo to hingkiꞌ mewali poꞌonina.”

“Mewaliꞌ, Kutiꞌikikei: inioꞌ tepe lalimi noniuꞌ i kotuwuꞌmi, hapo to hingkiꞌ iꞌokakei hei to i inukei. Inioꞌ woꞌo tepe lalimi noniuꞌ i peparewami. Kotuwuꞌmi meloliu tene ka pangka, hei wotami meloliu tene ka parewa.

Angkana ane mekokaekei, mekahikei pe lali kamaraꞌmi hei iwitikei wambaꞌmi, honiꞌkei mekokae pe Umoꞌmi to hawaꞌi iꞌokiꞌkei. Alaꞌ Io pangkiꞌ waliami to tewuni tiꞌo hei Io hingkiꞌ mampaꞌanikei howonina.

Mewaliꞌ, ane mekokaekei itiꞌikei waheꞌe: Umoꞌki to i suruga, kipokodeꞌ konaꞌMa to mangkolehi. Kiperapiꞌ hingkeꞌna Ipotongawa poparentaMa, hinamo lekiꞌ-lekiꞌna toaꞌ mampetuntui peleihaMu i duniaꞌ hibali i suruga.

Ipaꞌanika kopongkonangki i ando hieꞌe hante maganaꞌ

hei Iꞌampunika ka komasalaꞌki, hibali ingka woꞌo moꞌampuni toaꞌ to masalaꞌ pe ingka.

Hei inioꞌka Ipotedehi nikeloi mowali dosa angkana Ipodaꞌka ka to kodake. [Alaꞌ Ingkomo Datu to moparenta, to makuasaꞌ hei to masipatoꞌ nipokodeꞌ wute nantolou-louna. Amin.]

Ane Iꞌampunikei toaꞌ to masalaꞌ pe ingkei, Umoꞌmi to i suruga hingkiꞌ moꞌampuni woꞌo salaꞌmi.

Ele tinti to meloka i raoha. Hawaꞌhi mantudaꞌ, hawaꞌhi mekina, hei hawaꞌhi woꞌo mamporia kinara i buhoꞌ. Angkana kehapoꞌi hatoꞌo, Umoꞌmi to uwaꞌ i suruga bateꞌna mampopopangkahi. Hapo tene ingkei. I pampeꞌelena Pueꞌ Ala, meloliu tene kotuwuꞌmi ka kotuwuꞌra tinti.

“Inioꞌkei morampu hei mamporia luma poduniaꞌ, alaꞌ luma poduniaꞌ noꞌoka bubuꞌ hei totohiꞌa. Tambi pamporideꞌa lumami wadi nirenda hei ohina ninako. Aginamo morampukei lumami i suruga. Alaꞌ luma i suruga hawaꞌi hingkiꞌ moholi, alaꞌ inoꞌo hawaꞌi uwaꞌ to mampototohiꞌa, hawaꞌi uwaꞌ to mampobubuꞌ, hawaꞌi uwaꞌ to morenda hei manako. Alaꞌ i imbo koꞌuwaꞌana lumami, itoꞌo nturusi pekirimi.”

“Hawaꞌi uwaꞌ haduo hawiꞌ to nobiaꞌ majama hampihalao i roduo tuana, alaꞌ haduo nopotanaꞌ, hei haduo nokabiriꞌ. Haduo nopetuntui hawaꞌne, hei haduo hawaꞌi notuntuni. Hatoꞌo woꞌo ingkei, hawaꞌkei ibiaꞌ mampetuntui peleihana Pueꞌ Ala, ane nopohawiꞌlukei doiꞌ.”

Howeꞌ kora i popada to tuwuꞌ i ando hieꞌe hei nihunu poꞌonina nopomaranga woꞌo Pueꞌ Ala, hapona tene ingkei meliu konorewahimio Pueꞌ Ala. Mewaliꞌ, mahamporeꞌi hinaꞌ hawaꞌi ipohinarukei perewahiNe?

Angkana, ane mempaꞌanikei hapolu pe toaꞌ, hangangaa mepaꞌanikei ngkawowuni, hampoliꞌmo paralu robahaꞌ toaꞌ ntaniꞌna. Alaꞌ Umoꞌmi to i suruga pobahaꞌ komoromiꞌna waliami to tewuni tiꞌo hei Io hingkiꞌ mampaꞌanikei howonina.”

Hi Yesu mampololiu lolitaNa, Notiꞌi, “Moromiꞌ-romiꞌkei hingkeꞌna inioꞌkei mowali lala poꞌagama i hinarora toaꞌ to woriꞌ hingkeꞌna niꞌokiꞌlukei. Alaꞌ ane iwalikei hatoꞌo hawaꞌkei hingkiꞌ pahua hapo-hapo ka Umoꞌmi to uwaꞌ i suruga.

“Ane mabokikei, inioꞌkei mampetomasusa lali, hibali toaꞌ to mampetoromiꞌlu i howali. Ane mabokihi, rotungkai hawaꞌi memporouꞌ ba mekarabiꞌ, hingkeꞌna robahaꞌ toaꞌ kopabokire. Tuꞌu to Kutiꞌikikei: toaꞌ to hatoꞌo waliara, hawaꞌi hingkiꞌ pahua hapo-hapo ka Pueꞌ Ala, alaꞌ rohuamo pamperenaki ka toaꞌ. Angkana ingkei, ane mabokikei, memporouꞌkei hei mekarabiꞌkei, hingkeꞌna hawaꞌi robahaꞌ toaꞌ kopabokimi. Bateꞌnalu Umoꞌmi i suruga to hawaꞌi iꞌokiꞌkei to pobahaꞌ kopabokimi. Io pangkiꞌ waliami kehapoꞌi hawaꞌi mombaha i toaꞌ, hei hingkiꞌ ihuakei howonine.”