Popular Bible Verses from GALATIA 5

Share

Tapi ane tau-tau to nikeniaka Nosa Nagasa nu Alatala, iwe'imo inggu ira: ira nosipotowe, ira nadamba-damba bo nasana rara. Ira nosabara bo nalusu bo nabelo rara ante tau ntanina. Ira namala raparasaya, ira naede rara, pade ira nanta'amaka dota koro ira mboto. Da'a ria Atura-atura agama to nombatagi pokainggu-pokainggu ewa etu.

Patujuku iwe'i: komi kana matuwu mantuki dota Nosa Nagasa nu Alatala. Ne'e aga matuwu mantuki dota rara to naja'a.

Ane kita nosaongu rara ante Nosa Nagasa nu Alatala masipato kita matuwu mantuki dota Nosa Nagasa etu wo'u.

Isema-sema to nosaongu rara ante Kristus nompakalipo inggu-ingguna to naja'a bo dota rarana to naja'a bo dota rarana to da'a namala nipampa.

Nanotomo pokainggu ntau to nantuki dota rara to naja'a. Jonjona iwe'i: ira nogau sala ante tau da'a rongo ira mboto, ira nowia to natantoru bo da'a nasipato. Ira nepue ka pue-pue ntanina bo ira nombadoti tau ntanina. Ira nosipobali ante tau ntanina, ira nosibaga, ira nasiriati, ira nasasinta narau bo ira aga nompekiri koro ira mboto. Ira aga nangelo posinggarau sampe nosinjabingga. Ira naino ka mbara-mbara ntau, ira nalangu-langu bo nasiromu nanggoni mpebasa, pade nadea wo'u pokainggu ira ntanina ewa etu. Jadi ewa to niuliku ka komi bopia, sangganipa kupopatora ka komi, tau tunggai noinggu iwetu da'a ntoto mamala majadi todea riara Poparenta nu Alatala.

Sampesuwu-sampesuwu, komi nipokio Alatala ala rakabasaka nggari Atura-atura agama. Tapi ne'e sampe etu majadi loga ka komi mantuki mpengele-ngele dota rara to naja'a. Tapi komi kana mosipotowe samba'a bo samba'a bo mositulungi

Sabana dota rara naja'a nangewa dota Nosa Nagasa, bo dota Nosa Nagasa nangewa dota rara to naja'a. Rongele etu nosiewa sampe komi da'a namala manggawia nuapa to nipodota komi mboto.

sabana pura-pura Atura agama nesua riara parenta to nanguli iwe'i: “Potowemo sanggamanusiamu ewa komi nompotowe koromu mboto.”

Ne'e kita malanga rara atau mosipoju'a ka rara, bo ne'e kita masiriati samba'a bo samba'a.

Kristus nanggabasaka kita nggari Atura-atura agama ala kita mpu'u-mpu'u makabasaka. Jadi pakaroomo rara komi ala komi batena makabasaka. Ne'e mana madota rapobatua.