Popular Bible Verses from Filipi 1

Share

Ji kwabom kam mo Yefun Allah do, Yefun Allah gato ben nin ti nggi wa nin ben An bi suk-i su ketke, bere An ben sukndo su nin gat sor, kom mo pe gato or mó, kom mo kam gato Yesus Kristus satu ma mo bur ré re.

Ji ndek mo Yefun Allah wa nin sare do: nin jimnotku yu wai kadit nyim ne o et, nin mewa yu sisu ndo wai o et, nin ben sukndo su yu mwa wai o et. Ji ndek mo Yefun subere nin jam Yefun kom mo mit, ete nin jam suk gato ndo kadit suk gato ibit wai kadit nyim ne o re, subere nin jam suk mwa gato ndo wai wa nin ben ne, orete nin ben suk gato ndo ne bu sor. Ji ndek mo Yefun subere ye yo ku os wa ki nin gum ibit mo suk yo mo nde kom mo kam gato Yesus Kristus satu ma mo bur ré re.

Ji dakai bi sukjimnut do, ji mbau yo, ji ben suk wa Yesus Kristus sor, wo ji kwop yo, ji ku suk gato ndo wai it anane.

Ji napawa nin yo, ji ki ndo mo Yefun Allah mo suk gato nin ben ne.

Yé sombok ji yo, ji kem more tó yo, nin ben nin bi suk-i tepsu sukdu subot os ndo gato Yesus Kristus kak ne sor. Nin ben suk tepsu sukdu gato ji duno nin su ne. Ji iwa nin ben nin bi suk-i sane subere ji ba ku nin yo, ji yo ba ku nde yo, ji jam sukdu subot nin do, nin tepsu dik wa nin jom Yefun bi sukdu-i pe sor. Nin mit dik si nin onyar dik wa nin duwer ye gato bariwa sukdu subot os ndo ne. Nin onyar kem mo sukdu ne pe sor.

Bere su kam gato yepasye ndo ji subot suk gato ji ben ne yo, ji mit iwa do, ji yo damen mo an gwem nde. Ji nut do, sangge bere ji yo nyuwa ji ki sukdu subot Kristus nai an nde. Sane yo, ji kwop o, ji mbau o, mo suk sino gato ji ben ne, ji bes Yesus Kristus gum kok petok sor.

Nin jam do, Yefun Allah ós nin kem ndo, we Yefun Allah syo An bi suktinggi nai nin subere ós nin onyar kem mo Yesus Kristus sor nde, wo An syo An bi suktinggi nai nin subere nin nggi wai kadit sukye gato nin ku ne.