Popular Bible Verses from Kolose 1

Share

Yefun Allah nai men wé kadit biris bi yekwesu gato jom men ne. Yefun nai men wé kadit ndendu bi os-i ete An nai men gum sok mo An bi Gan bi rus-i ne it. Sane An bi Gan gato An jimnotku ne jom men mone re.

Yefun Allah anato tepsu i-ke wa fro suk mwa gato mo bur ré si gu nim ne sino, wo Ye gato ut suk mwa ne anato Yesus Kristus, sane anato An gum kok wai o re. Yesus Kristus ut suk gato men me su men gro. An ut suk gato men yo me su men gro nde. An ut suk mwa gato i-mok mone. An ut malaikat mwa ne sino. An ut suk mwa ne sino gato nggiwa jom yetu mo bur ré si gu nim ne. Kristus ut suk mwa gato mo gu nim ne si bur ré sino, subere Kristus tepsu Yekwesu wa jom sukmwa gane.

Yefun Allah yo fro wa ut suk yo mo nde tó, Yesus Kristus mó re. Kristus anato ut suk mwa gato mo bur ré si gu nim ne mo bi nat-i re, subere suk mwa ne sino kas sisu ndo sor.

Men yo me Yefun Allah su men gro nde, sarewo Kristus gato men ku ne, An tepsu Yefun Allah dakai. Kristus ré, An gum kok wai kadit suk mwa gato Yefun Allah ut ne sino, sane anato ye kendo An gum do, Yefun Allah bi Pa doketke.

Men jam sukdu mwa ré subot nin re, sane anato men ki suk su Yefun Allah wa nin petok sor. Men ndek mo Yefun Allah subere Yefun Allah Gen kak nin bi sukjimnut wa nin jammo suk mwa ne sino gato Yefun Allah iwa nin ben ne rer kom mo mit. Men ki suk su Yefun wa nin sane subere nin kem mo bur ré, nin ben nin bi suk-i tepsu Yefun Allah mit, nin ben suk gato An iwa nin ben ne petok sor. Nin ben sane yo, bere suk gato bor kadit suk mwa gato nin ben ne ndo sino, bere nin jam Yefun Allah sisu ndo wai o kadit nyim neya o re.