Popular Bible Verses from YESAYA 65

Share

Ri wettu dé'napa naéllauwi, mappébali-Ka; ri wettu dé'napa napura massempajang, Utarimani sempajanna mennang.

Makkedai PUWANGNGE, “Maélo-Ka mébbu langi iya barué sibawa lino iya barué. Kajajiyang-kajajiyang iya riyoloé riyallupaiwi matu sibawa dé' nariyéngngerang paimeng.

Sininna iya napogau'é mallolongengngi, sibawa ana'-ana'na mennang dé' namaté tennasenna-senna. Mennang sibawa wijanna mennang Ubarakkakiwi matu untu' mannennungeng.

Patettongngi matu tauwé bola sibawa aléna monroiwi; tau laingngé dé' naonroiwi matu. Natanengiwi matu mennang palla anggoro'é sibawa péneddingiwi uwai anggoro'na; tau laingngé dé' naénungngi matu. Malampé sunge'i matu umma'-Ku pada-pada ajué, sibawa péneddingiwi wassélé jamanna mennang.

Ana'-ana'na dé'gaga maté ri wettu baiccu, sibawa tau battowaé narapii matu umuru macowa. Tau iya makkéumuru'é sératu taunna riyangga'i malolo, sibawa tau iya maté ri yolonaéro riyangga'i nakenna pahukkungek-Ku.

Serigalaé sibawa ana' bimabala'é sisamai manré wella; manréi daramé singaé pada-pada sapingngé, sibawa ulaé dé'na nabbahayana. Ri sininna bulu-bulu-Ku iya mapaccingngé, dé'na gaga iya mapparogiyé iyaré'ga pogau'i majaé.”

Aléku paimeng marennu matu nasaba Yérusalém, sibawa mariyo-riyo nasaba pabbanuwana. Ri kotaéro dé'na gaga teri, sibawa dé'gaga kelli méllau tulung.