Popular Bible Verses from YESAYA 41

Share

Aja' mumétau, saba' Iyya sibawakko, aja' mumanenneng, saba' Iyya Allataalamu. Upakkasse'ko matu sibawa Utulung, Udulung sibawa limak-Ku iya poré.

Saba' Iyya PUWANG, Allataalamu, makkatenningngi lima ataummu; adak-Ku, ‘Aja' mumétau, Utulukko matu.’ ”

Itani, sininna tau iya macaié lao ri iko, ricaui matu sibawa masiri senna. Sining tau iya méwaékko, binasai matu sibawa cappui risering.

Purano Uwala polé ri cappa-cappa'na linoé, Uwobbi polé ri onrong-ngonrong iya kaminang mabélaé. Adak-Ku, ‘Iko ritu atak-Ku; dé' Usampéyangngi pappilé-Ku.’

Musappai matu sining tau iya méwaékko, iyakiya dé' muruntu'i matu. Sining tau iya mammusué sibawa iko binasani makkekkuwangngé sibawa teddéng.

Adanna PUWANGNGE, “Aja' mumétau, Israél, namuni baiccu'ko sibawa malemma. Iyya ritu PUWANG iya tulungngékko, Iya Pommapaccingngé, Allataalana Israélié iyanaritu Pappassalama'mu.

Iyakiya iko, Israélié, atak-Ku, umma upilé-Ku, iko wijanna Abraham, sellao-Ku.

Uwébbui matu massolo sining saloé ri bulu-bulu iya makellué; mompoi matu mata uwai ri tengngana tanété. Padang kessi'é Upancajiwi matu tappareng; jompii matu uwai polé ri tana marakkoé.

Rékko sappai uwai iyaro bangsa-Ku iya macilakaé, sibawa marakko tigero'na mennang nasaba madekkai, na Iyya, PUWANG, baliwi matu sempajanna; Allataalana Israélié dé' nasalaiwi matu umma'-Na.

Niga pogau' manengngi iyaro? Niga pattentui lalenna sejaraé? Iyya, PUWANG, Iyya'na ritu iya mammulangngé, sibawa tette engka lettu paccappureng.

Utanengiwi matu pong camara padang kessi'é, pong zaitun, pong murad sibawa pong akasia. Padang makkale-ale'é Upancajiwi matu ale, ale camara, berangang sibawa ajuwanging. Nanaitai matu sininna tauwé sibawa naissenna makkedaé Iyya, PUWANG, iya pogau'éngngi. Napuriyatiwi matu mennang sibawa najeppuiwi, Allataala mapaccinna Israélié mébbui iyaro kajajiyang.”