Popular Bible Verses from Roma 5

Share

Agáiáná Pueꞌ Ala tiꞌara noꞌonoꞌ. Tangaꞌtaꞌ mani tueꞌ i lalu dósá, Ia mopatongawaꞌ ahiꞌNa i kitaꞌ moliu kamatena Kerisitu to mosulewátáikeꞌ.

Hai ane mehárungákeꞌ i Pueꞌ Ala, pehárungántaꞌ iti tiꞌara ina mepakanawoꞌ, láwiꞌ upu-upu to tahárungá hangko i Hia bateꞌna ina mewaliꞌ. Taisá kamaꞌahiꞌna Pueꞌ Ala i kitaꞌ, láwiꞌ Inao to Magasaꞌ to mopatongawaꞌ i laluntaꞌ kamaꞌahiꞌNa iti.

Hai tiꞌara iti peá. Góeꞌkeꞌ woꞌo i lalu kapári to morampekeꞌ, láwiꞌ taisá: hangko i kapári iti, megurukeꞌ bona mantaha. Hai ane mantahakeꞌ, ina Napokanakeꞌ Pueꞌ Ala. Hai ane taisá Pueꞌ Ala mampokanakeꞌ, bateꞌna ina mantámbái kamaróhóna pehárungántaꞌ i Hia.

Mewaliꞌ deꞌe-deꞌe, manótómokeꞌ i peitána Pueꞌ Ala ánti pepoináláintaꞌ. Onoꞌ haneꞌi maroꞌa miꞌi pohintuwuꞌtaꞌ hai Pueꞌ Ala ánti kanatangaꞌ-tangaꞌintaꞌ Pueꞌtaꞌ Iesu Kerisitu. Mewaliꞌ pepoináláintaꞌ i kanatangaꞌ-tangaꞌintaꞌ Iesu Kerisitu to mopahintuwuꞌkeꞌ hai Pueꞌ Ala, mopatongawaꞌ katahádiána kabulána laluna Pueꞌ Ala i lalu katueꞌtaꞌ deꞌe. Hai góeꞌ laluntaꞌ, láwiꞌ ara pehárungántaꞌ, álána taisá kaꞌina molámbiꞌtaꞌ gáláꞌtaꞌ i kapeawaꞌna tueꞌna Pueꞌ Ala.

Kamaꞌahiꞌna Pueꞌ Ala i kitaꞌ node: i tempóntaꞌ mani maledeꞌ {láwiꞌ tiꞌarakeꞌ peisá mohintuwuꞌ hai Pueꞌ Ala hangko i róhóntaꞌ haduduántaꞌ}, Pueꞌ Iesu mate ánti dósántaꞌ, hai tempó kamateNa iti napakanótó miꞌi ami Pueꞌ Ala.

Mewaliꞌ deꞌe-deꞌe, kitaꞌ mewaliꞌmokeꞌ manótó i peitána Pueꞌ Ala láwiꞌ Iesu mate mosulewátáikeꞌ, onoꞌ haneꞌi ina tekábáhákeꞌ hangko i kamabukoꞌna Pueꞌ Ala {i alo pobutusi i kahópóꞌána duniáꞌ}.

Ánti katiꞌárána mengkoruꞌ Adama i Pueꞌ Ala, upu-upu tauna mampeuláꞌi Adama hai madósá. Agáiáná Iesu mengkoruꞌ i Pueꞌ Ala haweꞌ-haweꞌ mate i kau mombehape. Ánti pengkoruꞌNa iti, upu-upu tauna peisá mewaliꞌ manótó i peitána Pueꞌ Ala.

Hai tiꞌara iti peá. Tapokagóeꞌ ntepuꞌu kamaroꞌana Pueꞌ Ala to talámbiꞌ ánti kamatena Iesu Kerisitu Pueꞌtaꞌ, láwiꞌ moliu Iesu Kerisitu, maroꞌa miꞌi pohintuwuꞌtaꞌ hai Pueꞌ Ala.