Popular Bible Verses from Salmos 119

Share

Ca tu beníʼ naca xtídzuʼu ga ridáʼ, en le ruzeníʼ nöza ga ral-laʼ tödaʼ.

Lu icja ládxiʼdaʼahuaʼ runaʼ ca rnna xtídzuʼu, para cabí gunaʼ dul-laʼ loʼ Liʼ.

¿Nacxi gaca gunbiʼ tu biʼi bönniʼ ga ugáʼana tsahuiʼ ládxiʼdoʼobiʼ? Ral-laʼ gunbiʼ ca rnna xtídzuʼu.

¡Bicaʼ ba nupa tun ca nácagaca le benëʼ ba nalí, en idú ládxiʼgaca taʼzë́ ladxiʼ Lëʼ!

Nacuʼ ca tu ga rucachiʼ cuinaʼ, en le run chiʼi nedaʼ. Runaʼ löza xtídzuʼu.

Benna quiaʼ yöl-laʼ réajniʼi para gun chiʼa xibá quiuʼ, en para idú ládxaʼa gunaʼ ca taʼnná.

Ben ga güíʼi ládxaʼa yuguʼ le nunuʼ ba nalí, para cabí güíʼi ládxaʼa yöl-laʼ ruhuidiʼ.

Naca dxiʼa buzötjuʼ nedaʼ para bizédidaʼ yuguʼ le gunná bëʼu.

Didzaʼ naʼ ruhuë́ tsahuiʼ nedaʼ cateʼ riguíʼi rizácaʼa, tuʼ tuʼsubán ládxaʼa didzaʼ bëʼu.

Ben ga gunaʼ ca taʼnná le gunná bëʼu, tuʼ raza ládxaʼa gunaʼ ca taʼnná xibá naʼ.

Busedi nedaʼ, Xan, ca taʼnná le gunná bëʼu, ateʼ gun chiʼa léguequi ga idxinrö dza udxi.

Ribödxi böʼ naca cazaʼ tuʼ risë́bidaʼ ládxaʼa. Butipa ládxaʼa, ugunuʼ dxin xtídzuʼu.

Nadxíʼideʼedaʼ xibá naguixjuʼ Liʼ. Idú dza rizáʼ ládxaʼa ca naca que.