Popular Bible Verses from Galatia 6

Share

Dahi daummali'-mali'angngi umbabe kamapiaang. Aka' ponna ke umbabe lolomingke kamapiaang, ya' la aha tempo ang puha dipama'tantu la nalambi' toingkea'ne' boana lupunta.

Dahi akinna ahake' tempo, ya' la pahallua' tapake yato tempo umbabe kamapiaang pano di paranta hupatau, la'bi-la'binna pano di solasohonta to mampetahpa'.

Anna la sidulu-duluikoa' mesa anna mesa undurung kamasuhsaang. Aka' ponna umpanoaa', ya' untuhu'imokoa'to pahentana Kristus.

Daumbulingnga'. Puang Alataala dai mala dipopangngino. Aka' aka ang dipamula, dia sia tunto nei' ang la dipupu boana.

Noanna ke membabeingke untuhu'i sipa' dosanta, ya' boana yatoo la ullambi'ingke kamateang, anna ponna ke membabeingke situhu' pangngelo'na Inaha Masero, ya' boana yatoo la ullambi'ingke katuhoang ang lambi' sapano-panona aka' nabeaingkea' Inaha Masero.

Oa' ingkämmu solasohongku, ponna ullambi' solamu to mampetahpa' umbabe dosa, dioa' ang tuho situhu' petehtena Inaha Masero la umpakalehaa' anna malai sumule pano di lalang kamarohoang. Ampo' la umpakalehaa' sibaha kamalunä'ang inaha anna kasa'bara'ang. Anna la undakaikoa' kalaemu andana bilang diongnga' pemala membabe noa.

Ponna aha tau ang unsanga-sanga kalaena anna setonganna dai sihatang, dianto disanga tau yatoo umbulitu' kalaena. Ingkänna tau pahallu umpihki' lolo umba noa pembabena. Aka' ponna mapia, ya' mala napomahasa inaha. Ampo' dai mangki' la napasiita umba noa pembabena anna pembabena tau senga'. Aka' ingkänna tau la pantang toboe' untangkung pembabe kalaena.