Popular Bible Verses from ROMA 8

Share

Allah, Ara afaimmas owe, asan akot atetameme. Era owe bajirisem apaye, bajirisem apok apaye, ere takes, era owe asan akot baemapom pak. Era owe ere, Allah, abimak binip akukuretiie jipu baem ajate owe erare.

Dambir atemtam apaye, jatiaptam aememtam apaye, Allah dara bafaim pak baemekarim asan apok. Malaikat takes apaye, wonamo oup pemerintah owe apaye, wonamo oup kapar owe apaye, Allah dara bafaim pak baemekarim asan apok. Owe waa aemaroas pak apaye, era asep bare aemtaroas pak apaye, wonamo oup pak apaye, ara aemansa tapirmi pak apaye, Allah akenemapomar wan pak apaye— ere, era pak takes, Allah dara bafaim baemekarim asan apok. Dere emes demsam. Emesare, dare Kristus Yesus daTuhan, takan ajamememmarom. Erarawa Allah dara afaimmaro.

Emesamare, dare kumiti aememtam, Allah Jip pi dara ajatomattemaro. Danom atakam Allah bajanimnak damsam apok. Me Allah Jip ere, atakam Allah ajanimtamemaro. Atakam Allah ajanimtamemaro ere, Allah Jipam jende daytinak atawuomeme. Dare asamot owe ere, jende daytinak atawuomemar pak, atakam baemekorekorom asan apok.

Dare emes apormarom ere, dare wama atakam okoretam? Emesare, Allah dare takan ajamememmaro. Erarawa owe dara baemekumimosom asan apok.

Emesare, waa Allah Kristus Yesus ajamkaimas owe, “Tare dosa owe,” emes atakam bokore apoknak aememem.

Era ajak basenomem pak bimak binip taka atetaramemas owe, dambir atememas. Me, Allah Jip akot apormar pak bimak binip taka atetaramemas owe, jiine aemememas. Are Allahjie akipimamtaeremas.

Me, Kristus dara afaimmaro. Emesare era pak takes dara bakumimosom apoknak. Dare fiaknak aememmarom.

Me waa ajirisememarom pakam, Allah atetamtaro akotipitnak pakam, ere awar apoknak. Dere era pak demsam.

Kristus dara bafaim, tao karimto? Ajirisemtam apaye, asan pota aemaptam apaye, owe aemsokomtaroas apaye, amostonak aememtam apaye, pakaian apok aememtam apaye, owe dara atatiitaroas apaye, ere era pak takes, Kristus dara bafaim bakarim apoknak.

Allah, asamot owe ajak bomon pak takes amsam. Erarawa Are Allah Jip abimak binipam amsam. Me Allah Jip, Allah akot apormar pak jipu, atakam Armat Ipit ajanimeme. Are, Allah, asan akot aowe batetam, emes atakam ajanimeme.

Me Allah Jip atakam ji bae owe, ere Allah arereis.

Era ajak basenomem pak jipu baem owe, ajak basenomem pak bimak binip taka atetaramemas. Me, Allah Jip akot apormar pak jipu baem owe, Armat Ipit akot apormar pak bimak binip taka atetaramemas.

Allaham Andep ban fiak bakem apoknak aeme. Are, Andep, dare takes dambir batemtam ataendaemtamero. Erarawa Are era akot pak takes dara batetam ere, wama tamenem?

Me Allah Jipam atakam daanakot owe akoromteteremaro. “Wore Allah jii.” Emes atakam aesimteteremaro. Allah, asan akot aowe atetameme. Danom Allah jii. Erarawa dare, era asan akot atoomemmarom. Armat Ipitam asan akot Kristus atetamtem. Danom asan akot Kristus takan ajamemomemtemarom. Dare Kristus takan ajamjirisemtam, danom Armat Apit, aakotipitnak pak takan ajamemomemtemarom.

Emesare, ajak basenomem pak bimak binip taka atetaramemas, Allah jokoman owe aemememas. Are Musa Basakamtam Atakam ji bae apok. Erarawa are Musa Basakamtam Atakam ji baemee asan apok.

Bare taka, Allah, arereis asan akotnak aemaptas pak, aporomtem. Me Allah akenemapome pak takes era pak bapor, jak aseseromemas. Are era pak banamek, apemes.

Waa ajiire aemansa ere, Allah akenemapome pak takes ajirisapemas. Erarawa are jende atawuomemas. Are, tapes, jii bajisipetii damo asesa emes tamen are. Danom emes damsam.