Popular Bible Verses from BAPOROMTAM ATAKAM 3

Share

Baporay! Dere jimsappu aememmin. Denom era jimsap akokomaaremin. Owe era jimsap apaimtamtanis apaye, Dere era tame ajiiaptemin. Derarawa, amos era owe takan andetemin.

Dere era aemaarukum pak demsam. Tare jufunak apok. Tanom ambapnak apok. Me, tare jufunak apaye, ambapnak apaye, ere akot. Me, tare ambap kope. Tare ambapnak apok. Tanom jufunak apok. Erarawa Dere tare besa tamen ajiejisimtemin.

Dere dofaimmin owe, ajatemotaeremin. Denom era owe ajurusumemin. (Ere era owe, akot pak baem, baememtam are.) Emesare, tare Dera bajamkai fiaka. Era pota pak ambakemkoromay.

Dere era aemaarukum pak demsam. Dere tabipu jimsap apaimtamo. Oweam era jimsap baemekapimapom asan apok. Tanom fiak koser aememmakam. Tanom deatakam ji aeekem. Tanom Dera bapatim apok aemenkum.

Dere era pota pak akumimosomtas owe, debaomep fe baemap asan Dere takan baemap, atetamtemin. Ere era pota pak akumimosomo, wanam Dere Deritipit abaomep fe baemap asan takan aemapom, tamen are.

Me tare, ‘Dare pak daytu. Danom uang daytu. Dare wan pak botaer apok.’ Emes atakam aesimemakam. Me, tare asan pota owe. Tanom ajarisapmakam. Tare pak apokam, banamek kapieam, damo basoam, aemapmakam. Tare ere, tamsam apok.

Emesare, asep bare, asamot owe takes bajurusum pak ajinaotem. Era bajurusum pak, owe takes baempor pak. Denom, tare jak fiak baememaar, atakam asakamtamo. Tanom era basakamtam atakam ji aeekem. Erarawa, era bajurusum bare aemamesto, denom bantem fiak tara ataiemtemin. Ere tare bajamjirisem apok.

Emesare, Dere fef ambaromemtemin. Me aemommakam pak ban fiak aesomomay. Owe takuus ajamapomtakam akot pak bataer-ombar.

Allah, era aemaarukum pak takes, aatakam jipunak apok apormar are. Denom emes apormin. Emesare, tare dambir baemken owe tamen. Erarawa, bawasitay! Tare jati pak kope aemapmakam. Era jati pak fiak aememay. Tare era jati pak dambir baem-ombar.