Popular Bible Verses from PILIPPI 2

Share

Ulang ma marsibaen di ibana laho manyarihon dirina be sanga laho manggodangkon dirina. Tapi gumonan ma sian toruk ni rohana be, etong hamu ma donganmunu na dumenggan sian hamu sandiri. Ulang hum na mamikirkon dirina sajo hamu; angkon laing pikirkononmunu do haporluan ni dongan na asing.

Angkon songon parroha ni Kristus Jesus do hamu

Anggo satutuna sarupa do Ia dohot Debata, tapi dihilala Ia nada pola angkon sai partahankononNia haDebataanNia i. Tapi ditadingkon Ia do sudena i gabe sarupa tu sada hatoban. Gabe songon jolma Ia, jana ngoluNia pe idaon laing songon jolma do. Dipatoruk Ia do diriNia jana burju do Ia mangoloi Debata lopus mate – i ma mate tarsilang.

angke Debata sandiri do na markarejo di bagasan dirimunu, na mambaen hamu gabe ra jana sanggup pasonangkon roha ni Debata.

Hara ni i ma umbaen na nipatuginjang ni Debata Ia sagincat-gincatna, jana dilehen tuSia goar na gumodang sian sandok goar na asing. Anso marsinggang ma di bagasan goar ni Jesus, sandok na di banua ginjang, na di tano on dohot na di toru ni tano on. Angkon torang ma okuon ni halahi paboa Jesus Kristus do Tuhan; jadi nipasangap ma Debata Ama i muda songon i.

Ulang ma marungut-ungut sanga martongkar hamu mangkarejohon sanga na aha. Di na songon i, patuduhon hamu ma paboa na tutu hamu dakdanak ni Debata, na so martilako, na bulus jana bonar di tonga-tonga ni angka halak na jahat dohot na mardosa. Jana di na palaluhon jamita taringot tu hangoluan i hamu tu halahi, angkon gabe songon sinondang na manorangi portibi on do hamu maradopkon halahi. Muda songon i ngolumunu, gabe adong ma dalan di au saulahon laho mamuji diringku hara ni hamu, di haroro ni Jesus Kristus mangulahi. I ma tandana, na so sayang boti parjuanganki jana marhasil do halolojangki.

Hara ni i hamu angka dongan na nihaholongan, songon pangoloimunu tu au dompak di tonga-tongamunu au, saonnari pe haru dung padao-dao, angkon mur olo ma hamu nian tu au. Usahohon hamu ma tongtong anso mur sanggam haluaanmunu i. Mardongan biar dohot hitir ma baen hamu sudena i