Popular Bible Verses from 1 KORINTUS 15

Share

Hara ni i hamu ale angka dongan na nihaholongan, sai togu ma hamu jana hot. Marsitutu ma markarejo di Tuhan, angke diboto hamu do, sude na nikarejohonmunu di Tuhan, nada sayang boti sudena i.

Tapi tarimakasi ma di Debata, dilehen Ia do antong hamonangan di hita markite-hite Jesus Kristus Tuhanta i!

Ulang jabat tarpaoto-oto hamu! Muda dipardongan hamu halak na jahat, gabe jahat muse do parangemunu na denggan i.

Tapi hara ni asi ni roha ni Debata, madung gabe songon au na adong saonnari on, au. Jana nada parcuma na niampunan ni Debata au. Hape gabe lumoja dope au markarejo sian sude rasul na asing i. Tapi i pe sudena, nada hara ni usahongku i; usaho ni Debata na mangakaholongi au do i jana na markarejo rap dohot au.

“Jo, hamatean, di dia do hamonanganmi? Jo, hamatean, di dia he corotmi?” Anggo corot ni hamatean i, i ma dosa jana kuaso ni dosa i, i ma Tona i.

Ligi da, hupaboa ma sada rahasia di hamu: Nada jabat mate hita sude tapi nipauba ma hita sudena. Di bagasan sangkidop mata do i sudena tarjadi, di na nipalu sarune na parpudi situtu. Angke dung tarbege sora ni sarune i, pangoluon ma mangulahi angka jolma na mate i marpamatang na manongtong jana paubaon ma hita sudena.

Angke hara ni sada halak do masuk hamatean i tu portibi on, laing songon i muse ma na mulak mangolu i sian hamatean, dipasahat tu jolma manusia markite-hite sada halak muse. Songon parmate ni sasudena jolma manusia hara ni na sapangalaho dohot si Adam, laing songon i ma pangoluon sudena, hara ni na dung sapangalaho dohot Kristus.

Pamatangta na ra mate on angkon mamake pamatang na so ra mate noma, jana pamatang na sian portibi on angkon mamake pamatang na sian banua ginjang noma.

Mamarenta ma Kristus lopus sude musuNia i tunduk tuSia baenon ni Debata. Anggo musu na parpudi patunduhonNia, i ma hamatean.