Popular Bible Verses from 1 KORINTUS 13

Share

Sobar do holong ni roha i jana burju. Nada mangiburu anggo holong ni roha i, inda marhata manggang, nada ginjang rohana. Nada jais holong ni roha i, jana nada manjalahi labo tu dirina sandiri. Nada parmuruk i jana nada disimpan ia hasalaan ni halak na asing.

Sanga aha pe na ro, tahan do holong ni roha i jana dihaporsayaisa do sude; anggo holong ni roha i nada unjung mago pangkirimonna jana sai sobar do i manaon sasudena.

Nada sonang holong ni roha i muda masa hageduhan, hum mida na sintong do marjop ni roha holong i.

Jadi tinggal ma na tolu on: Haporsayaan, arop ni roha, dohot holong ni roha; tapi na gumodang sian na tolu i, holong ni roha do.

Nada ra luntur holong ni roha i. Anggo hamaloon laho manyurirangi, di sada hatiha abis do i dibaritahon. Taringot tu hamaloon laho mangkobari di hata na marragam-ragam na so niastuan i, di sada hatiha mago do i. Taringot tu hamaloon laho mangastui sasude, sada hatiha mago do i.

Sugari tarbaen iba mangkobari di angka hata ni jolma, dohot di hata ni surusuruan, hape inda nihaholongan angka dongan na asing, tudos ma iba songon doal na maruolol sanga songon canang na mangkuling-kuling.

Sugari malo au manyurirangi, jana huboto sude na buni dohot sude parbinotoan, jana adong di au haporsayaan jabat tarpaorot au angka dolok, tapi nada adong di au holong ni roha, songon na soada do au.

Sugari sude pe sinadonganniba dilehen tu halak na pogos, jana sugari pe nipadiar pamatangniba hona tutung, tapi anggo so nihaholongan do halak na asing, nada adong guna ni i sudena.

Dompak menek au, songon pangkatai ni dakdanak na menek do pangkataingku, songon dakdanak na menek pangkilalaanku, jana marpikir au songon parpikir ni dakdanak na menek. Saonnari madung magodang au; ma hutinggalkon pangalaho sihadakdanahanku.