Popular Bible Verses from Wóɖómà 4

Share

Gèɖèpɔ́ɔ̀ nyɛ́nɛ́ín-ɖáìn-ɖɛ̀ɔ̀ jè ɔ se ma hwòɖǒ sɔ̃́ ɓéɖé. Ɔ taɓa ma Gèɖèpɔ́ɔ̀ hwìɖǐǐ. Ké ɔ hwìɖǐǐ-taɓa-taɓaɔ̀ kùìn ma ɔ dyi, ké ɔ ɓàìn ma Gèɖèpɔ́ɔ̀, sepóɛɖé ɔ dèɛ̀ ma hwòɖǒ kɔ̃ jɛ́ɛ́ cá kà ɓɛ́ Gèɖèpɔ́ɔ̀ ɓéɖé kpé, ɓɛ́ ɔ ké ɖɛ ɔ ɖáìn ma ɔ nyɛ́nɛ́ín nyɛɛ nyu kɛ.

Kà Gèɖèpɔ́ɔ̀-cèè-ɖɛ̀ɔ̀ nyuɛ kà cɛ̃ɛ, ɔ ɖá, “Ní mu m̀ ɓóɖó-dù ɓáún-ɓáún ɓǎ mú nyuùn.” Ééɓòɖòhɛ̃́ɛ̀ mɔ̀ ɓóɖó-dù ɓáún-ɓáún ɓǎ ɖé Gèɖèpɔ́ɔ̀ ɓɛ́ ɔ taɓa ma kà hwìɖǐǐɛɛ dyéɖéín. Gèɖèpɔ́ɔ̀ mɔ̀ nyɔ nyuɛ ké nyɔ ɓě ɖǎà mɛ́ɛ cĩ́à ɖeɛ̀, ké ɔ cɛ̃ ɖɛ ɓě séè nyu keɛɛ jè pū, kà ɔ ɖǎɔ̌ kà wa nyuɛ.

À Bounɓo Jízɛ̀ mɔ̀ nyɔ ɓɛ́ wa ɖáɓá ma kà ɓó à ɖɛ gbà ɓě jè kɛ̀, ké ɔ mɔ̀ nyɔ Gèɖèpɔ́ɔ̀ zà ma kà gĩɔ, ɓɛ́ ɔ ké à dyí sɛ́ɖɛ́ìn ɖé Gèɖèpɔ́ɔ̀ dyéɖéín nyɛ̀.

Ɖɛ kɔ̃̀ jè Ééɓòɖòhɛ̃́ɛ̀ dè ma hwòɖǒ kɔ̃ɛɛ, ɔ seɛ ma xwíníín ɖò ɓéɖé, kɛɛ ɔ taɓa Gèɖèpɔ́ɔ̀ hwìɖǐǐ, ké ɔ dè nyɛ́nɛ́ín-ɖáìn-ɖɛ̀ɔ̀ dyé jè hwòɖǒ kɔ̃. Ɔ taɓa Gèɖèpɔ́ɔ̀ hwìɖǐǐ kà ɔ mu ma ɓóɖó-dù ɓáún-ɓáún ɓǎ jǔùn wɛ̃, kà Gèɖèpɔ́ɔ̀ nyuɛ ma kà ɔ gbo cɛ̃ɛ kɛ. Ɔ ɖá, “Kà dɛ̀nɛ̀ mɛ́nɛ́ɛ́ ɓě jĩ̀à kɛɛ, kǎà nì xwíníín-dyù ɓě mu jĩ̀ìn.”

Nyɛ́nɛ́ín-ɖáìn-ɖɛ̀ɔ̀ dyììn ɖé hwìɖǐǐ-taɓa-taɓa mú, ɓɛ́ ɖɛ séín ké Gèɖèpɔ́ɔ̀ kpeɖe nɔ̀mɔ̀ dyíinɔ̀ mú dyììn, ɓɛ́ Ééɓòɖòhɛ̃́ɛ̀ nyúà-dyú séín ɓěɔ̀ ké nyɛ́nɛ́ín-ɖáìn-ɖɛ̀ɔ̀ ɓéɖé wɛ̃́ɛ́. Ɔ se nyɔ ɓě dèà gmaɔ̀ hwòɖǒ kɔ̃ɛɛ ɖòùn bìì, kɛɛ ɔ mɔ̀ ɓó nyɔ ɓě ɓéɖéà hwìɖǐǐ-taɓa-taɓa ɓɛ́ Ééɓòɖòhɛ̃́ɛ̀ ɓéɖéà kɛɛ bìì ɖekè, sepóɛɖé ɔ mɔ̀ à séín ɓǎ.

“Nyɔ ɓě ɓɛ́ mana nì kɔ̃ɛɛ mɔ̀ nyɔ ɓě kɔ̃̀ nàmàǔn ɓě ɓɛ́ Gèɖèpɔ́ɔ̀ ɖǎ kɔ̃in zĩ̀ìn, ké Gèɖèpɔ́ɔ̀ ɖǎ waà ɖɛ gbà ɓěɔ̀ wa bũ̌in wɔɔ̀ kɛ. Nyɔ ɓě ɓɛ́ mana nì kɔ̃ɛɛ mɔ̀ nyɔ ɓě ɓɛ́ Bounɓoɔ̀ se zaa kpɔ̃̀ìn ɓó ɖɛ gbà ɖò nyu jèɛ.”

Kɛɛ xwɛ̌ Gèɖèpɔ́ɔ̀-cèè-ɖɛ̀ɔ̀ ɖáá? Ɔ ɖá, “Ééɓòɖòhɛ̃́ɛ̀ taɓa Gèɖèpɔ́ɔ̀ hwìɖǐǐ, ké Gèɖèpɔ́ɔ̀ ɖáìn ɔ dyí-sɛ́ɖɛ́ìn-nyɔ̀ dyììn ɖé ɔ hwìɖǐǐ-taɓa-taɓaɔ̀ mú.”