Popular Bible Verses from Fèɖópĩ̀à 4

Share

Ɓěɛ̀ hwòɖǒ ní gbǎìn dyií ɓó ɖɛ ɖò jè. Kɛɛ ti séín ɓě mu Gèɖèpɔ́ɔ̀ ɓaàùn wɛ̃ɛ, ɓě mɛ zɔ̀ ɖɛ ɓě kɔ̃̀ ɓě ké dyéɛ. Ɓě mɛ po ɔ zùo tee, ɓɛ́ ɓě ké ɔ ɖɛ zɔ̀.

Ké Gèɖèpɔ́ɔ̀ gìɖìǐ kɔ̃̀ jè nyɔǔn-dyù seà múin wɔ̃́ɔ ɓɛ́ìn nyɛɛ mu ɓěɛ̀ hwòɖǒ-dyùàɔ̀ kè ɓěɛ̀ fɔ̀nɔ̀-hwòɖǒɔ̀ gbo kpáùn, ɓɛ́ ɔ ké wa dyí gmɔ̀ ɖé Kɛ́ɖɛ́ì Jízɛ̀ mú.

Ḿ ɖíí ɓě, ɖɛ hwɛ̀ìn-gbɔɔ̀ mɔ̀, ɓě mɛ poìn ɖɛ ɓě nɔ̀mɔ̀ dyíin, ké wa nɔ̀mɔ̀ dyíin ɓɛ́ nyɔǔn ké wa ɓàìn nyɛɛ jè hwìɖǐi tee. Wa mɔ̀ ɖɛ ɓě mɔ̀ jǎà, ké nyɔǔn ɓɛ́ìn kpéín dyéɛ kè ɖɛ ɓě sɛ́ɖɛ́ìn dyí se kɛɛ ɖò ɓéɖé kè mú-ɖɛ̀ɓɛ̀-ɖɛ̀ ɓě ɔ kè ɖɛ ɓě zi dyíin nɔ̀mɔ̀ǔn wɛ̃.

Ḿ ɓɛ́ìn kpé ɓó ɖɛ séín nyu jè, dyììn ɖé Kɛ́ɖɛ́ì mɔ̀ nyɔ nyíà ḿ kpéɔ̀ kɛɛ mú.

Ɓě mɛ kpá múàǔn ɖé Bounɓoɔ̀ mú tee. Ḿ mɛ cɛ̃ɛ ɖe. Ɓě mɛ kpá múàǔn.

Ké ní Gèɖèpɔ́ɔ̀ mu ɖɛ séín ɓě kɔ̃̀ ɓě kéɔ́ ɓéɖéɛɛ ɓě nyíìn sɔ̀ìn ɖé ɔ bã-ɖɛ̀ zi dyí ɓúáuń nìà ɖé Kɛ́ɖɛ́ì Jízɛ̀ múɛɛ mú.

Ɖɛ ɓě ɓɛ́ ɓě ɖǎ ḿ gbo cɛ̃́, ké ɓě ɖǎ dyi kpɔ̃ sɔ̀ìn ɖé ḿ xwaún wɛ̃ɛ, ɓě mɛ nyu wa. Ké Gèɖèpɔ́ɔ̀ mɔ̀ nyɔ nyíà nyɔǔn gìɖìǐɛɛ mu ɓě gbo nììn.

Nyɔǔn séín mɛ dyuòɛ̀ dyí kà ɓě ɓéɖé hwòɖǒ nɔ̀mɔ̀ dyíin ɓó nyɔǔn séín gboɛ. Bounɓoɔ̀ dyi-dyiɔ̀ ɖǎ dyi xwɛ̃́ìn.

Ḿ dyuò kà ɔ jǔ ké nyɔ ɖò se ɖɛ ɔ kɔ̃̀ ɔ kéɔ́ dyéɛɛ ɓéɖéín, kà ɔ jè nyu nìɛ̀ kɛɛ dyí. Ké ḿ dyuò kà ɔ jǔ ké nyɔ ɖò dyi ɖɛ pàɖǎ ɓéɖéín, kà ɔ jè nyu nìɛ̀ kɛɛ dyí. Ḿ ɖǎ ɖɛ nìà kɛ cɛ̃́. Ɔ jèɛɛ, dà séín ɓɛ́ ḿ nì kɛ ɔ kè ɖé ɖɛ séín múɛɛ, ní hwòɖǒ dè dyi, kɛbì ḿ mɛ ɖoɓo, mɔɔ kɛbì mɔ́ mɛ nyu ḿ wɛ̃, mɔɔ kɛbì ḿ mɛ ɓéɖé ɖɛ pàɖǎ, mɔɔ kɛbì ḿ mɛ se ɖɛ ḿ kɔ̃̀ ḿ kéɔ́ ɓéɖéɛɛ ɓéɖé kɛ.

Ḿ se ɖɛa cɛ̃, sepóɛɖé ḿ nì ɖɛ ɖò mɔ́uń jè. Sepóɛɖé ḿ ɖǎ kà ní hwòɖǒ ké ɖɛ ḿ ɓéɖéɛɛ gboi dèɛ̀n nyuɛɛ cɛ̃́.