Popular Bible Verses from Máfíò 5

Share

Nyɔ ɖò ní kpɔ̃̀ìn ɖáùnpò dyí, ké ɔ ní dèɛ̀ gbǎ-wĩín xwíɖíi. Kɛɛ ɔ dèɛ̀ ɖáùnpò-kɔ̃-dè-ɖɛ̀ɔ̀ kɔ̃, ké ɔ nyí nyɔǔn séín nì gbǒɔ̀ múɛɛ ce. Kà dyúáɖòɔ̀ kǎà ɓěɛ̀ ceɔ̀ mɛ fã ɖé nyɔǔn dyéɖéín, ɓɛ́ wa ké ɖɛ nɔ̀mɔ̀ kɔ̃in ɓě ɓɛ́ ɓě nyuɛɛ dyé, ɓɛ́ wa ké ɓě Ɓǎ nìà ɖé dyɔún wɛ̃ɛ ɓàìn.

“Ɓě nì kà ce nìà kɛɛ ɓó ɓóɖó-kpàà bìì. Hwɔɖɔ ɓɛ́ wa dè ɖé toɖo dya kɛɛ se vǐèɛ̀ ɓɛ́ìn.

“Mana nì nyɔ ɓě ɓɛ́ wa se kɛɛ ɖò ɖé wa hwòɖǒ bũ̌ ɓéɖéɛɛ kɔ̃, sepóɛɖé wa mu Gèɖèpɔ́ɔ̀ dyéìn.

“Mana nì nyɔ ɓě ɓɛ́ ɖɛ kɔ̃̀ tó nyu wa mìɔ kɛɛ mɔ̀ ɖɛ ɓě ɓɛ́ Gèɖèpɔ́ɔ̀ mɔ́ ɓɛ́ wa ké nyuɛɛ kɔ̃, sepóɛɖé Gèɖèpɔ́ɔ̀ muɛ nyuùn ɓɛ́ wa ké ɖɛ séín ɓě ɓɛ́ wa mɔ́ kɛɛ dyé.

Kɛɛ ḿ cɛ̃ɛ ɓě gbo, ɓě mɛ ɖɛ̀ɓɛ̀ ɓěɛ̀ mú-nyɛ́-nyɔ̀ ɓěɔ̀ mú, ké ɓě mɛ ɓaà ɓó nyɔ ɓě ɓɛ́ wa dyéìn ɓě gǎ kɛɛ bìì

“Mana nì nyɔ ɓě ɓɛ́ wa dyé gǎ ɖé zùǔn-wàká kɔ̃ɛɛ kɔ̃, sepóɛɖé wa mɔ̀ nyɔ mu Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ kɔ̃̀ùn.

“Mana nì nyɔ ɓě ɓɛ́ wa vɔ̃ ɓɛ́ gìɖìǐ ké nyɔǔn ɓě pṹa nì kɛɛ kɔ̃, sepóɛɖé Gèɖèpɔ́ɔ̀ mu wa ɔ dyú ɓě ɖáìn.

“Mana nì nyɔ ɓě ɓɛ́ wa vĩ̌ kɛɛ kɔ̃, sepóɛɖé Gèɖèpɔ́ɔ̀ mu waà hwòɖǒ dyi dèìn.

“Mana nì nyɔ ɓě ɓɛ́ nyɔǔn ɓě dyéìn gǎ, sepóɛɖé wa nyu ɖɛ ɓɛ́ Gèɖèpɔ́ɔ̀ mɔ́ kɛ jèɛɛ kɔ̃, sepóɛɖé wa mɔ̀ nyɔ mu Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ kɔ̃̀ùn.

“Mana nì nyɔ ɓě ɓɛ́ wa dyé nyɔǔn wìǐn nyɛɛ kɔ̃, sepóɛɖé Gèɖèpɔ́ɔ̀ mu wa mɔ̀ùn wìǐn dyéìn ɖekè.

“Mana nì ɓě mɔ̀ nyɔ ɓě ɓɛ́ nyɔǔn dyéìn gǎ, ké wa zàìn ɓě zùǔn, ké wa cɛ̃ ɓě ɖɛ gbà kã̀ìn-kã̀ìn se jǎà kɛɛ kɔ̃ún ɓó ḿ jèɛɛ kɔ̃. Ɓě mɛ kpá múàǔn mìɔ, sepóɛɖé pɛ́ɛ̀-ɖɛ̀ vɛ̀nɛ̀ ɖò nì ɖé dyɔún ɓó ɓě bìì. Sepóɛɖé kǎà wa dyéìn ma kpáá-ɖɛ̀-cɛ̃-nyɔ̀ ɓě nì zɔ̃̌ɔ̀ kĩ́ín nyɛɛ gǎ.

“Mana nì nyɔ ɓě ɓɛ́ wa dyà wa mìɔùn ɓíɖíiɛɛ kɔ̃, sepóɛɖé wa mu ɓóɖó-kpà gànáà kɔ̃̀ùn.

“Ɓě nì kà tɔ̃́ nìà kɛɛ ɓó ɓóɖó-kpàà bìì. Kɛɛ ɔ jǔ ké tɔ̃́ɔ̀ ɖéé-ɖééɔ̀ dyi ɔ mú sɔ̀ ní, nìí, xwɛ̌ ɔ ɓɛ́ìn ɖéèɛ̀ nyuɛ ɖe kɛ́? Ɔ se ɖɛ ɖò kpa ɖe. Wa wáɖáa dyi, ké nyɔǔn nàà kɔ̃in.

Ɓě mɛ zi dyí sɛ́ɖɛ́ǐn, kà ɓɛ́ ɓě Ɓǎ nìà ɖé dyɔún wɛ̃ɛ sɛ́ɖɛ́ìn kà dyí kɛ.

Ɓě mɛ ɖá ‘Ǹdye’ mɔɔ ‘Gbào’ pū. Ɖɛ tɔ̀ɔ̀ séín ɓɛ́ ɓě mu cɛ̃ìn ɖeɛɛ, ɔ sɔ̀ ɖé Ɖɛ-gbà-nyu-nyɔ̀ɔ̀ gbo.

“Ɓě ɖǎa wɔ̃́ kà ɓɛ́ wa cɛ̃ɛ zɔ̃̌ɔ̀, ké wa ɖá, ‘Nyɔ ɖò dyi ɔ mǔè ɖò dyéɖé-ɓò ɖò wa ní, nìí, wa ɓéɖé ɓɛ́ wa ké ɔ nììn dyéɖé-ɓò ɖò wa ɖekè, mɔɔ nyɔ ɖò dyi ɔ mǔè ɖò nyɛ́nɛ́-ɓò ɖò wĩín jaɖa ní, nìí, wa ɓéɖé ɓɛ́ wa ké ɔ mɔ̀ùn nyɛ́nɛ́-ɓò ɖò wĩín jaɖa ɖekèɛ.’ Kɛɛ ḿ cɛ̃ɛ ɓě gbo, nyɔ ɖò dyi ɓě ɖɛ gbà bũ̌ nyu ní, ɓěǐn ɖá ɓɛ́ ɓě ké ɖɛ gbàɔ̀ kpa zà. Nyɔ ɖò dyi ɓě kpá ga taɓa ní, nìí, ɓě mɛ wɔ̃́ ɓɛ́ ɔ ké ɓěɛ̀ ga tɔ̀ɔ̀ kpá taɓa ɖekè.

Ɔ jǔ ké nì ɖiaún-dyèɖèɔ̀ dyiɛ nyu ɓɛ́ m̀ ké nàmàǔn nyu ní, nìí, m̀ mɛ zàà ɖéɛ, ɓɛ́ m̀ kéɛ xwáɖáún po. Ɔ nɔ̀mɔ̀ dyíin ɓɛ́ nì kpóɖó-dyùà wáká ɓěɔ̀ ɖò ké xwáɖáún sè, ké ɔ zi ɓɛ́ wa ké nì kpóɖó-dyùà gànáɔ̀ hɛ́ɛ̀ poɛɛ dyí. Ɔ jǔ ké nì ɖiaùn-sɔ̃̀ɔ̀ dyiɛ nyu ɓɛ́ m̀ ké nàmàǔn nyu ní, nìí, m̀ mɛ cɛ̃ɛ ɓóɛ, ɓɛ́ m̀ kéɛ xwáɖáún po. Ɔ nɔ̀mɔ̀ dyíin ɓɛ́ nì kpóɖó-dyùà wáká ɓěɔ̀ ɖò ké xwáɖáún sè, ké ɔ zi ɓɛ́ nì kpóɖó-dyùà gànáɔ̀ ké hɛ́ɛ̀ muɛɛ dyí.