Popular Bible Verses from 2 Kɔ̀ɖéíntĩ̀ɔ̀ 1

Share

Ɓěà mɛ ɓàìn Gèɖèpɔ́ɔ̀ mɔ̀à à Bounɓo Jízɛ̀ Kɛ́ɖɛ́ì Ɓǎ kɛ. Ɔ mɔ̀ nyɔ-wìì-kɔ̃-ɓéɖé-Ɓǎ. Ɔ kɔ̃̀ xwaún ɖéɛ nyɔ hwòɖǒ-dyi-dè-dè séín sɔ̀ìn kà kɛ̀. Ɔ dè à hwòɖǒ dyi ɖé à gǎ-dyé-dyé séín mú, ɓɛ́ à ké kpé ɓɛ́ìn, ɓɛ́ à mɔ̀ùn ké nyɔ ɓě ɓɛ́ wa nì gǎ-ɖɛ̀ kã̀ìn-kã̀ìn dyí dyéɛń nyɛɛ hwòɖǒ dyi dè. À dè wa mɔ̀ùn hwòɖǒ dyi dyììn ɖé hwòɖǒ-dyi-dè-dè dyúáɖò ɓɛ́ à mɔ̀ùn dyé ma ɖé Gèɖèpɔ́ɔ̀ gboɛɛ mú.

Kà dyúáɖò ɓɛ́ à kè Kɛ́ɖɛ́ì peɖeìn kà ɔ gǎ-dyé-dyé kúɖúú ɓěɔ̀ múɛɛ, kà dyúáɖòɔ̀ kǎà dyììn ɖé Kɛ́ɖɛ́ì múɛɛ, à kèɔ̀ kè peɖeìn ɔ hwòɖǒ-dyi-dè-dè zià dyí ɓúáuń wɛ̃ɛ mú ɖekè.

À nì ma pū kà zaa kpɔ̃à à nììn, ké à ɓéɖé ɓɛ́ à kéà mɛ́ɛ. Kɛɛ ɖɛ nìà kɛ kpá ɓɛ́ ɔ kéɛ nyu ɓɛ́ à ké se à mìɔùn hwòɖǒ kɔ̃ dè, kɛɛ ɓɛ́ à ké Gèɖèpɔ́ɔ̀ mɔ̀ nyɔ zàà nyɔ gĩɔ kɛɛ hwòɖǒ kɔ̃ dè.

Gèɖèpɔ́ɔ̀ mɔ̀ nyɔ kùìn à kè ɓě dyi ɖé Kɛ́ɖɛ́ì mú, ké ɔ ɖǎ à wáká po. Ɔ ɖǎ ɔ dyí-dyuòìn-bɛ̃̀ɔ̀ à kɔ̃ po, ké ɔ tò ɔ Zùùɔ̀ ɖé à hwòɖǒ-dyùàɔ̀ mú ɓɛ́ ɔ ké ɖɛ séín ɓě ɓɛ́ ɔ ɓéɖé à bììɛɛ ɓo-kɔ̃-pòìn-ɖɛ̀ jǔ.

À mɔ̀ùn dyi gǎ dyéín, nìí, ɔ mɔ̀ ɓɛ́ ɓě ké hwòɖǒ-dyi-dè-dè kè pó-pó ɓéɖé jè. À hwòɖǒ dyi dyi dèǐn, nìí, ɔ mɔ̀ ɓɛ́ ɓě ké hwòɖǒ-dyi-dè-dè ɓéɖé jè. Ɔ mɔ̀ hwòɖǒ-dyi-dè-dè ɓɛ́ Gèɖèpɔ́ɔ̀ nyuɛ ké ɓě ɓéɖéà, ké ɓě kuà hwòɖǒ, ké ɓě kùìn kà gǎ-dyé-dyé ɓě ɓɛ́ à mɔ̀ùn kùìn kà hwòɖǒɛɛ hwòɖǒ kɛ.