Popular Bible Verses from Márcos 6

Share

Enga Jesús chojningame dacadigode: –Boyóji te ga oyope uacacajnaquéode uja to. Ga ajínañoma yu aja sañeque ujetiga gusúabu yóguiji enga yocope yocujñare to jne.– Uje Jesús urúo udojo gu uje ayorébui a ca ore cho dajame uje ore tibágui ore gatuaque. Jecute que togome ore ujetiga ore tagu dabotique.

Mu Jesús chojningame ore: –Yirajágo uje ore edójnari u Dupade uruode atatasónique mu ujetiga tṍraji punire uñeque. Mu jé basa ore urása uté gosi enga que toc ujetiga ore chise acajnaquéode unétique go. Jé isocai tu ome uté jogasúrique to rĩ, uje que ore tangári uté to gotique.

Jecute Jesús ore chise dabatigai mu chimo ayorébui iji dejode enga chosõripise ore. Uje ore gajnunie u áyasarigui ome Jesús uje íjnoque ore irodisónique. Ga jé jogadi u uje Jesús chosõre ore ga chacate ore ome Dupade uruode quique dipeséode.

Jecute que toc ujetiga Jesús pésu dapesútedatérique iji dedai uté. Uje Jesús aníri tu gu uje ore popísaja. Mu jé chiqueta ayoréode garósiode uje chujé dajmainie aja ore gáyode. Enga jé u uje Jesús chopise dáyugu darasade uje que ore changuretapise úringai Dupade utocaite gu. Jecute Jesús chijnime re iji udore ore gari, ga chicáji ore idai uté dosadode ujetiga chacate uñane ore iji.

Jecute Jesús chisa arurégode uje chejna yijmanai. Mu jé u uje chajire gaté bajaque enga chacãre Dupade gai ome. Ga jé u uje chajuque arurégode udore aja jnumi. Enga jé u uje chisi ome dacadigode ore enga chojningame ore: –De do jã. Beyoi ga ajuguínaño ayorébui ore jnese jne.– Enga isocai jé upo udore ome oyite gáreode rĩ. Jecute ore tagu arurégode jé aja oyídode rĩ enga ore chĩreta dacadie jnese. Enga ore chejna chagúi guesi enga ore chamáta daquebéode. Ga ore chĩreta doradie ijnacojoi iji daquebéode enga gare iji yirídai ore ĩretadie.