Popular Bible Verses from Éxodo 23

Share

Eduyo uacangureni Dupapísi uyu yúringai picatecãraite enga a yatapísaja uaque jne ga a yisi ome yodi ome uaque jne jeta ójiyo, jé aja cucha pibotígo to jeta acho. Ga a yipésu uaque jne enga jé ca ejnarétacapo uaque to jne rĩ. Enga a jé ca jĩraque atoyoi to jne uje cáma uaqueruei u gu. Enga a jecucha yátaja chequedíe iji uacanínique to jne ga a ca uacarásaraque chequé déji jne jeta atique carujnáji bisideque, jeoga uaté goto jé ca aberé goto enga a uacarásadie ore atígui cuse jnese jne iji uacaniri údode.

Dupade qué jnopo daruode údi ga chojninga: "A yiroque yirógode gaté unirísõre uñéngaja bei jne. A uté chajire uaquéode jne enga a cho dajéode quigome ua aja baqui tuté punire yúode. Yojningai punire uté a dimane jne iji baquei uje e yipésu cuchade aja quigode ome uaque gu.

Jé ũrepise yu ome yojningai uté uje a angári uté ome cuchade jnese jne uje yuru quicho udore ome uté gu ga a yátaja ua ome bamajosórone ore jne, enga a udore ore jmongarája uaque jne mu a jé basa yijmongarája ore to jne jeta yirota uaque. Jeta ore chãraque uacaquénique ome uaque jne marínga, a uyu u jne jeta yicha yu aja udore ore yui ome uaque, enga a jé ca ore bisitique pijógome dajequigode udore ome uaque jne.

Ujeta uacojórigo ayoré ore tṍrai dedo ome dapesutígo cucha gajnarécho jne, mu baraja uje gajnarécho ga jé ca apésu to. Mu jeta gusu ua jeta etaque udore, ga jé gusu ua jeta ca apésu, ga jé dóji ga jé ca apésu to. Ujetiga ayorérique pésu daba gajnetique cucha ga jorane ore chojninga jnese: 'Que pésu arĩa. Que pésu arĩa.' Mu baraja úringai máraque ga jé ca amíninga udore ore, ga uté jé tiógara dáringai márangome ua uje barajapise bai gu. Ujetiga máraque ayoré jmatátique enga jé basa ga cho daba date gajnaréngone to. Enga jé ca osõre uté jne ome ijmátaringuéi.

Ca ajnime barúrigo ome bojórique ayoré ujetiga aguhéta cuchárique uté gai uje que uté bai u gotique. Jé cho to ujetiga baraja uje gajnareque bojórique ayoré atique enga jé ca apógu uté gosi ome eduguéjnane, enga jé ca ãrarare uté gai iji ore iquénique.