Popular Bible Verses from UISAYA 43

Khangelani ke, ngoku ndenza entsha; ewe, seyisenzeka, nani niyayibona. Ndiza kuvul' indlela enkangala, kutsho kuqukuqele imilambo entlango.

Noba sewucand' emanzini, mna ndiya kuba nawe; noba sowuwela imilambo, ayisoze ibe nako ukukukhukulisa; nditsho sowucand' emlilweni, soze urhawuke; amadangatye akanakukutshisa wena.

“Kambe ke sanukubambelela kwisiganeko sezolo; hayi bo, sanukunokoza ezamandulo.

Ngoku ke *uNdikhoyo, umdali wakho, Yakobi, nombumbi wakho, Sirayeli, uthi: “Uze ungaxhali wena, ndikuhlawulele; ndikubize ngegama, ungowam ncakasana.

Kum uxabisekile ke kambe; yeka elo wonga, andikuthandi ngako! Ndincam' izizwe ngenxa yakho; ndinikezel' iintlanga, ndizuze wena.

Kaloku mna Ndikhoyo ndinguThixo wakho, uYedwa kaSirayeli, uMhlanguli wakho. Ndinikezela ngeJiputa ukukuhlawulela; iKushe neSebha zothath' indawo yakho.

Uze ungaxhali, ndinawe mna; inzala yakho ndoyiqokelela empumalanga, nina ndiniphuthume nasentshonalanga.

“Ukanti mna ndim ozisusayo izono zakho. Ndenjenjalo ngenxa yesidima sam; ukundivukela kwakho sobe ndibe sakukhumbula.

“Ke nina ningamangqina am,” utsho uNdikhoyo, “izicaka zam endazinyulayo, ukuze nindazi nikholose ngam, niqonde ukuba ndinguye endinguye. Ngaphambi kwam akukhange kubekho thixo; ewe, yaye engasoze abekho.

Mna ndim uNdikhoyo, ndim ndedwa ohlangulayo.

“Ewe, bendingokhoyo kwamandulo; akukho kuphuncuka esandleni sam; endikwenzayo akujikwa mntu.”

Neenyamakazi ngokwazo zondihlonela, oodyakalashe neenciniba zindincome, xa sendimpompozis' amanz' entlango, kubalek' imilambo enkangala, khon' ukuze lusel' usapho lwam, nditsho usapho olukhethiweyo, bantu abo ke ndazidalelayo, khon' ukuze bandidumise.”

Kwelasentla ndothi: ‘Bakhulule bagoduke,’ kwelasezantsi ndithi: ‘Ungabathinteli.’ Oonyana bam babuyise kwelikude, neentombi zam eziphelweni zehlabathi, nditsho wonke umntu obizwa ngegama lam, wonke endamdalela udumo lwam, wonke endambumbayo ndamenza.”

Utsho uNdikhoyo, umavul' indlela enqumla elwandle, nditsho indlela ecanda kumsinga olephuzayo; umkhosi wamagorha wawurholela enzonzobileni, uwonke nje iinqwelo namahashe; wafadalala, soze uphinde uthini, wafuthaniselwa mpela njengekhandlela

Mna ndinguNdikhoyo, uYedwa wenu, uMdali noKumkani wakho, Sirayeli.”