Popular Bible Verses from Hebreos 10

Share

Ja̧danö, ökwödö Cristonö ösödadöma jo̧banö ösödö doko̧ko̧kwa̧lobö jo̧be chömöledö. Jejenö ko̧ko̧kwa̧lö dö̧ji̧ma kadatiboko. Ökwödötjö ju'wedöma tjo̧wi̧, katjatibinobe bakobe ökwödökwö ko̧ko̧kwa̧lökönö. Jejenö ko̧ko̧kwa̧lö dö̧ji̧ma kadatiboko. Ja̧danö, ko̧ko̧kwa̧lö ökwödöda yöbawö pjadatakwawobö jo̧be, Duluwo̧ Jesús yemidanö ichakwa̧ möle, ja̧danö Dios lȩebi̧ yöawakwa̧ mölema tjo̧wi̧ jwiinö lekwokobetjö̧.

Ja̧danö chö̧ja̧wo̧dö, ökwödöma dömöledökwö ja̧nö domajadenö budekwabinö yödawakwawobö jo̧be, Dömöledönö ösödabikwawö dö̧jaduwo, bakwelajatebö pjabatö, jö̧ba̧lö.

Chö̧ja̧wo̧dö ökwödöma, Diosnö do̧'wo̧ wana̧lö ja̧dösa, jö̧ba̧lö yöda̧lobe. Ja̧danö, Dios jö̧a̧li̧danö isabenö badekwachakobe, jö̧ba̧lö, omukwatö ju̧kwadösa. Jejenö omukwatö jo̧banö do̧'wo̧ wana̧lö jwaikwöda di̧'yaduwo, jo̧ba jö̧a̧li̧danö badekwachakwa̧ te'ada̧lö. Isabenö, jwaikwöda do̧'wo̧ wana̧lö di̧'yobö jo̧be, Diosma isabenö jö̧a̧li̧danö ja̧bo̧obetjö̧.

Chömöledö, me'dawachibökönö kwi̧'yaduwobö jo̧be. Ja̧danö Jesúsnö kabatibökönö, Diosnö kwo̧'wo̧duwi wana̧lö tupakwö kwi̧'yaduwo, iteda wei̧ a̧ja̧kwö ja̧nö. Jejenöma Dios iyakwa̧, iteda yöbawö junö, Chiyocha, jö̧ba̧lö, iyakwa̧ma kwemaduwakwedöja.

Jo̧kwaobetjö̧ Dios ö̧jobekwö tedachaduwo chömöledö, jo̧banö ösödö. Omukwataduwökönuwi, ¡Ayö! Ötjöma Dios öba a'otjö wene juna̧lo̧sa, jö̧ba̧lö. Dioskwö chichibobö jwibo̧sa, jö̧ba̧lö, omukwataduwökönuwi. Jejenö domukwatobö jwiobe chö̧ja̧wo̧dö. Tjo̧wi̧, ökwödöma ja̧ domukwati̧tjö dichö loinawö̧sa, Jesús ökwösobunö lilibö. Ja̧danö chö̧ja̧wo̧dö jwiinö salöobu ojwiyonö idichinawö̧sa, Dios öba a'otjö dewadöda badibinö. Jo̧kwaobetjö̧ Dios ö̧jobekwö tedachaduwo, okwa dichawedöda, Jesús imidawinanö jwiinö do̧'wo̧ wana̧lö.

Jo̧kwaobetjö̧ chömöledö, jejenö kwö̧jinaduwi̧danö jemi tupakwöbi jwaikwöda kwi̧'yaduwo, Diosnö kabatibökönö. Diosnö kwo̧'wo̧duwi wana̧löda kwi̧'yaduwo, Dios jö̧a̧li̧danö isabenö baledakobe, jö̧ba̧lö. Isabenö chömöledö, ju'wi möle Dios otiwi̧ iyakwa̧ma kwemaduwakwedöja.

Chö̧ja̧wo̧dö döwaisa, Jesúsda midawö woinobe Dios ökwödö ju'wi mölekwena sulabenö ja̧di̧ma söbebö loobö, jö̧ba̧lö. Jo̧kwaijayonö ökwödötjö bakwo̧, Dios isabenö iwene waiso̧ma, Jesúsnö katatibo ötjö sulabenö chösödi̧da ja̧bö chö̧jo, jö̧ba̧lö, omukwatitjö̧ma ¿ju'wi Diosnö iyawa jo̧beji̧, jo̧ba sulabenö ja̧i̧ söbebö loobö? Jwiobe. Chömöledö ju'wi iyawa jwiobe sulabenö ja̧di̧ söbebö loobö iyawama. Jesús iteda iyawinada pjaatobe sulabenö ja̧di̧ söbebö loobö. Chömöledö, bakwo̧ Jesúsnö kabatibajo̧ sulabenö ja̧ena, ja̧ sulabenö ja̧i̧ma Diosma söbebö lookobe. Jo̧bama ju'wi möle Dios öba a'ö ja̧nö Dios labinö lȩbebö yöawi̧ a̧ja̧kwakwo̧, yelösöda. ¡Ayö! Diosma jwiinö ölabikobe jo̧banö, Jesúsnö kabatibö sulabenö ja̧bö jo̧nöma. Jo̧banö i̧sebakobe iteda jwiinö ölabi̧, ökwöla jwiinö tubi̧danö ölabi̧ma. Ja̧ Dios jwiinö ölabi̧ma jo̧ba öpöjojodönö juwö loakwola tubi̧danö ölabi̧. Chömöledö Dios jwiinö ölabi̧ma ¿ökwödönö i̧sekwobö dösödiji̧? Döpöjöda. Labobe yelösöda. Jo̧kwaobetjö̧ jweinö omukwatö Jesúsnö ösödö kwi̧'yaduwo, jo̧banö kabatibökönö.