Popular Bible Verses from Éxodo 20

Share

—Ötjöma Isabenö Jo̧sa, Kwösödaduwökwe Diossa. Ötjödasa Egiptotjö lakebaduwinö pjabatinama, Egipto jojodö wetjawö̧ otidö kwö̧jaduwitjö. Baikwö wetaduwakwö: Ötjönöda kwösadaduwo. Ju'wedönö kwösödaduwoko.

Ja̧danö, kwotidaduwoko kwo̧'wo̧duwi jawa kwösödaduwawö̧nöma, mölejebi ju̧kwadö tjo̧'wo̧ jawabi, böjenö jukwadö tjo̧'wo̧ jawabi, böje teebe ojwe okwa ju̧kwadö tjo̧'wo̧ jawabi. Ja̧jaye otikwa tjöba a'otjö kwöbaduwi bȩbachibö nijakwö kwuuduwinö kwösödaduwoko ötjöda Isabenö Jo̧chobetjö̧, Kwösödaduwökwe Dioschobetjö̧. Ile nibebo̧sa ökwödönöma, Ötjönöda kwösödaduwo, jö̧ba̧lö. Isabenö, o̧'wo jawa ösödadönöma lȩtebakwo̧sa, ja̧danö jobadönödamaö̧kö̧, ba̧kwȩlö̧jatebö̧ lȩtebakwo̧sa jobadötjö tupadanö jojodönöbi. Jao, ötjönö öpöjödö o̧'wo jawa ösödadö tji̧tji̧munöbi, tjö̧'dö̧dönöbi, ja̧danö tjö̧'dö̧dö tji̧tji̧munöbi, ja̧danö tupakwö, tjö̧'dö̧dö tjö̧'dö̧dönöbi lȩtebakwo̧sa.

Ja̧danö, ju'wibi wetaduwakwö: Kwabe'donö, kwojo'donö otiwanö omukwatö yebabinö kwö̧jaduwo. Jejenö otiwanö kwomukwataduwo lekwe kwuju̧kwaduwakobetjö̧ niji chiyakwemi ja̧nö, ötjö Isabenö Jo̧, Kwösödaduwökwe Dios kwiteboduwi baibanö chiyakwemima.

Ja̧danö, ju'wibi wetaduwakwö: Jojodö otikwö̧kö̧ mölȩ, wainö kwujunaduwi̧ mölȩ, inesö mölȩma kakatibaduwoko. Ja̧ mölȩ wainö kwujunaduwo, inesö mölȩ, jö̧ba̧lö, ötjönö kwömukwataduwobö.

Ja̧danö, ju'wibi wetaduwakwö: Ötjö chimima sulabenö omukwatö yöka̧laduwoko, ötjöma Isabenö Jo̧chobetjö̧, ökwödö Kwösödaduwökwe Dioschobetjö̧. Ötjö chimi sulabenö omukwatö yöba̧lo̧nö lȩtebakwo̧sa.

Ja̧danö, jelemutjö bakwöta mölȩ baledibanö okobe jwiinö kwotidawaduwi̧ma kwotidaduwo. Jo̧kwaijayonö jelemutjö dötölataja mölȩ, sábado mölȩ baibenama kwö'wachaduwo, ötjö Isabenö Jo̧nö, ökwödö Kwösödaduwökwe Diosnö omukwatö kwö̧jaduwobö. Ökwödö otidökönö kwö̧jaduwobö jo̧be, ja̧ mölȩma. Ja̧danö, kwi̧tji̧muduwi ömadöbi ya̧döbi otidökönö tjö̧jobö jo̧be. Ja̧danö kwömöayedöduwi ömadöbi ya̧döbi otidökönö tjö̧jobö jo̧be. Ja̧danö kwa̧jwi̧mutjö otidadöbi otidökönö tjö̧jobö jo̧be, kwa̧jwi̧mu̧bi tjö'wachakobetjö̧. Ja̧danö ju'wedö jelobetjö ichinadö kwiteboduwinö ju̧kwadönöma tjotidobö weköbaduwoko.

Ja̧danö ju'wibi wetaduwakwö: Kwömöledöso̧ eju ösödöma kwedaduwoko, ötjö cheju baibanö chösöda, jö̧ba̧lö. Ja̧danö, kwömöledöso̧ ilekwonöma ösödöma kwedaduwoko, chösödoko, jö̧ba̧lö. Ja̧danö kwömöledöso̧ ömöayo̧nöbi ömöayujunöbi, ötjöda chömöayedö batjibanö chösöda, jö̧ba̧lö kwedaduwoko. Ja̧danö a̧jwi̧mu̧ pa̧kayönöbi a̧jwi̧mu̧ bu̧lu̧dönöbi ju'wi jayebi kwömöledöso̧ ujunani̧ma ösödama kwedaduwoko, ötjöda chajwimu batjibanö chösöda, ja̧danö iteabi ötjö chitea baibanö chösöda, jö̧ba̧lö— jejenö domulataja jawa weawa yöbawijetö Isabenö Jo̧ma.

Ja̧danö ju'wibi wetaduwakwö: Kwömöledöso̧, wene juna̧lo̧ma omukwatö juno̧ luwo̧ öbajale a'otjö ja̧nö kwatadaduwobö aebitjö̧ma omöna yöka̧laduwoko.

Ja̧danö ju'wibi wetaduwakwö ömadönö: Jelo̧ ilekwokwö sulabenö ja̧bö kwalewaduwoko. Ja̧danö ya̧dönö wetaduwakwö: Kwilekwebö̧kö̧kwö sulabenö ja̧bö kwalewaduwoko.

Ja̧danö, ju'wibi wetaduwakwö: Bakwo̧ jelo̧nö kwabö loköbaduwoko.

Ja̧danö, ju'wibi wetaduwakwö: Kwönaukwaduwoko.