Popular Bible Verses from Deuteronomio 8

Share

Baikwö jweinö kwomukwataduwo jö̧ka̧laduwi̧ yötawaduwakwö chömöledö, –Otiwanö chujuna̧li̧ma chuluwo̧ Isabenö Jo̧ Diostjö ichi̧, –jö̧ba̧lö. Jau chömöledö, kwuluwo̧duwi Diosma damötjö da'dödönö yöbawö ujuninobe, ökwödönö pjaatakwa̧ma, ja̧danö jejenö yöbawö ujunina badekwachakobetjö̧, babe inesö otiwanö pjaati̧ ökwödönö pjaatobe.

Jau chömöledö, Juluwöködösa, jö̧ba̧lö kwöwaisachibaduwakobetjö̧, ajayinö a̧wi̧chi̧löji̧ weinobe, ikenama mölejebetjö tjoduwi̧ Mana ötjabi̧ kwawawa iyinobe, ökwödöbi kwa'dödöbi wajwiköbinaduwa jawa kwakwawa kwukwaduwobö iyinobe. Jejenö ba̧ja̧dö iyinobe chömöledö, kwöwaisachibaduwakobetjö̧, –Sule kwakwawa kwanödama otiwanö jö̧ködö jojodöma, okobe jwiinö Isabenö Jo̧ yöawi̧ da̧ja̧kwitjö̧da otiwanö dö̧jakwedösa, –jö̧ba̧lö kwöwaisachibaduwakobetjö̧.

Ja̧danö kwo̧'wo jwikibaduwoko chömöledö, kwuluwo̧duwi Isabenö Jo̧ Dios cuarenta o̧biya baledibanö jojodö deobe ökwödönö öibinama. Jejenö ökwödönö öibinobe chömöledö, ökwödönö ö̧ba̧ja̧dobö, –Juluwöködösa, Diosnö do̧'wo döwana̧lobö jö̧ba̧ladösa, –jö̧ba̧lö kwöwaisachibaduwakobetjö̧. Ja̧danö ju'wibi jejenö öibinobe, kwomajadeduwinö kwomukwataduwi̧ öwawakobetjö̧, isabenö jo̧ba wei̧ kwa̧ja̧kwaduwakwojobö, kwa̧ja̧kwaduwökakwojobö, jö̧ba̧lö.

—Chömöledö, kwomukwataduwoko, –Aaa, nöinö chujuna̧li̧ma, ötjöda chujuluwobetjö̧, ötjöda chujulunö otiwanö nöinö juna̧lo̧ batibajabe, –jö̧ba̧lö.

—Jo̧kwaijayonö, baikwö lȩtebaduwakwö chömöledö, jejenö otiwanö kwiteboduwinö kwö̧jaduwenama, teada̧lönö kwö̧jaduwo, kwuluwo̧duwi Isabenö Jo̧ Diosnö kwo̧'wo jwikibaduwapji jö̧ba̧lö. Ja̧u chömöledö, kwuluwo̧duwi Diosnö omukwatö, jo̧ba wei̧, ja̧bö kwö̧jaduwobö wei̧bi, ju'wi wei̧bi jwaikwöda a̧ja̧kwö kwö̧jaduwobö ja̧kobe, babe ökwödönö yötawi̧ jawama.

—Isabenö kwomajadeduwinö kwöwaisaduwobö jo̧be chömöledö, tjabe'dodö tji̧tji̧munö ba̧ja̧dö jwetjebi̧danö, kwuluwo̧duwi Isabenö Jo̧ma ökwödönöbi jwebebö ba̧ja̧do̧, jö̧ba̧lö.

Jobe ja̧nö, ju'wi mölekwena otiwanö kwomeawaduwinö kwukwaduwakwedöja, ja̧danö kwiteboduwi ösödö, kwuluwo̧duwi Isabenö Jo̧ Diosnö ösödö yöka̧laduwakwedöja, –Isabenö otiwemi niji ditebo baibanö kwiyajabe, –jö̧ba̧lö.

Jo̧kwajabetjö kwuluwo̧duwi Isabenö Jo̧ Diosnö yebabinö omukwatö, otiwanö wei̧ a̧ja̧kwö kwö̧jaduwo chömöledö.

ja̧danö jo̧bada kwa'dödö wajwitjina kwakwawa Mana ötjabi̧ jawa mölejebetjö tjoduwobö webinama, kwakwawa jwiena kwukwaduwobö. Jejenö ökwödönö pjabatinama, kwuluwo̧duwi Diosda chömöledö, ja̧danö jejenö ökwödönö öbibö ö̧ba̧jadinobe ökwödönö, –Juluwöködösa, –jö̧ba̧lö kwöwaisachibaduwakobetjö̧, ja̧danö jo̧ba wei̧ kwa̧ja̧kwaduwakwojobö jö̧ba̧lö öwawakobetjö̧. Ja̧danö, jejenö öbibö ba̧ja̧dajo̧, inesö otiwanö ökwödönö pjaatakobetjö̧, jobekwö öibinobe kwuluwo̧duwi Diosma chömöledö.

Teada̧lönö kwö̧jaduwo chömöledö, kwuluwo̧duwi Diosnö kwo̧'wo jwikibaduwapji jö̧ba̧lö, baikwö yötawa: Jobe ja̧nö, kwomeawachibaduwanö kwukwaduwakwedöja, ja̧danö o̧do otiweju otidajadö, otiwejubiyanö kwö̧jaduwakwedöja, ja̧danö kwajwimuduwi tjö̧ba̧jȩkwachobetjö̧, ba̧jȩkwadönö kwajikwaduwakwedöja, ja̧danö okobe jwiinö ju'wi kwiteaduwibi ba̧jȩkwachakobetjö̧, kwiteaduwi nöinö kwujuna̧laduwakwedöja. Ja̧danö, jejenö baibenama, teada̧lönö kwö̧jaduwo, –Aaa, otiwadösa, –jö̧ba̧lö, kwuluwo̧duwi Isabenö Jo̧ Diosnö kwo̧'wo jwikibaduwapji jö̧ba̧lö. Jau chömöledö, kwuluwo̧duwi Diosnö kwo̧'wo jwikibaduwobö jwiobe, baikwö yötawa: Kwuluwo̧duwi Isabenö Jo̧ Diosda usula emawö ju'wedö tjömöayedö kwö̧jinaduwelö Egipto nijitjö labebö öbibinama.

Jau chömöledö, kwuluwo̧duwi Isabenö Jo̧ Diosma isabenö pjabato̧ ökwödönö, babe juluwanö ökwödönö öibakobe, inesö otiwemi nijinö kwö̧jaduwobö. Ja̧ otiwemi niji baikwö labebö lobö yötawa: Ja̧ nijitjö, ojwebiya nöinö lo̧be, ja̧danö ojwese'diju welachibobe, ja̧danö niji teebebi okwobe, sobö waköbaduwobö. Mösa'ijutjöbi, wabekijutjöbi jejenö ojwiyo nöobe ja̧ nijima. Ja̧danö ju'wibi, ja̧ nijitjö trigobi, cebadabi otiwanö pokwö wa̧jo̧be, ja̧danö ubabi, higosbi, granadosbi, otiwanö wa̧jobe. Ja̧danö olivos towibiyabi otiwanö wa̧jobe jobema, ja̧danö wayo̧bi nöobe jobema. Isabenö kwakwawa nöobe jobema, ja̧danö okobe jwiinö kwujuna̧laduwo jö̧ka̧laduwi̧ma, jobe otiwanö jo̧be chömöledö. 'Dii jawabi jobe inawiyatjö otiwanö kwemaduwobö jo̧be chömöledö, ja̧danö mösa'ijutjö otiwanö cobre sobö kwemaduwobö ja̧kobe, 'dii jawatjöbi, cobretjöbi otiwanö kwotidaduwakobetjö̧.

Tupakwö yöawinobe Moisesma, israel jojodönö: —Chömöledö, okobe jwiinö babe Dios wei̧ ökwödönö yötawi̧ma, teada̧lönö a̧ja̧kwö kwö̧jaduwo, otiwanö debö 'yö̧könö kwö̧ba̧jȩkwachaduwakobetjö̧, ja̧danö Isabenö Jo̧ kwa'dödönö yöbawö ujuninemi nijibe tebachö, otiwanö kwiteboduwi baibanö kwö̧jaduwakobetjö̧.

Ja̧danö chömöledö, cuarenta o̧biya baledibanö kwekachinaduwijayonö, kwö̧ka̧miji̧do̧ma suli̧ waekwinokobe, kwömasapiyama 'ye'yeachinokobe, nöinö kwekachinaduwajayonö, jö̧tö?

Jo̧bada jojodö deobe, nibadö a̧ko'döbi, itiyubi tju̧ju̧kwobe inesö kököobe niji otiwanö kwöbaledaduwobö pjabatinama. Jo̧bada 'dii̧ inawatjö ojwiyo döobö webinama, ojwiyo jwiena otiwanö kwowaduwobö