Popular Bible Verses from 1 Pedro 4

Share

Ja̧danö inesö mikwawi̧ ja̧bö kwö̧jaduwobö yötawaduwakwö chömöledö, jwaikwöda kwömöledö Jesúsnö ösödadönö ösödabikwawö kwö̧jaduwo jö̧ba̧lö. Ja̧ma, ju'wi jayetjö bajalekwönönö inesö mikwawi̧ chömöledö, jejenö ösödabikwawö kwö̧jaduwitjö̧ma, kwömöledö sulabenö ja̧tjaja̧ omukwatökönö jobadönö ösödö kwö̧jaduwakobetjö̧.

Diosma ökwödönö bakwo̧nökwena ja̧bö kwö̧jaduwobö iyinobe chömöledö, ¿jö̧tö? Jau chömöledö, ökwödönö bakwo̧nökwena iyinobe, jo̧kwajabetjö̧ ja̧ iyina jweinö omukwatö, ja̧bö kwö̧jaduwobö iyinadanö kwömöledöduwinö pjabatakwawö kwö̧jaduwo.

Baikwö yötawa: Yöbawadöma, Dios yöawi̧ yötjawobö jo̧be, ja̧danö pjabatadöma, Dios ujulunö pjabatö tjö̧jobö jo̧be. Jejenö Dios iyinadanö ja̧bö kwö̧jaduwenama, Diosda ökwödönötjö pjaatobe jojodönö chömöledö. Ja̧danö Dios pjaati̧ edö okobe deinö Diosnö tjösödakobe, Jesucristo midawö woinobetjö̧ otiwanö pjabato̧ja jö̧ba̧lö. Jau chömöledö, Dabe'do Diosda ba̧kwȩlö̧jatebö dejatinö juluwo̧ma ja̧danö jo̧bada inesö la'aka luwo̧ma, babebi ba̧kwȩlö̧jateböbi, jejenö otiwa.

Jo̧kwaijayonö Cristonö kwösödaduwobetjö̧ usula kwemawaduwitjö̧ma, ja̧ma taba lö̧jökö ji̧ chömöledö. Jau chömöledö, Cristonö kwösödaduwobetjö̧ usula kwemawaduwenama, Diosnö kwösödaduwobö jo̧be, isabenö Cristonö chösödobetjö̧ usula emawo̧sa jö̧ba̧lö.

Ja̧danö chömöledö, 'dö̧ibaji̧ möle yöneawachibobe. Jo̧kwajabetjö̧, jweinö omukwatö eda̧lakwawö kwö̧jaduwo, ja̧danö waisanö omukwatö Diosnö abebö kwö̧jaduwo.

Chösödawö̧ chömöledö, kwöwaisaduwa, babe inia tjöbö usula kwemawaduwi̧ma, dakwö ja̧köbaduwojobö jö̧ba̧lö baledobe, ¿jö̧tö? Jau chömöledö, kwöwaisaduwa, isabenö Jesúsnö ösödadö usula demawobö jo̧be jö̧ba̧lö, jo̧kwajabetjö̧ jejenö baledenama, Ayö, biya̧ma ¿tajawedö baledobejö? jö̧ba̧lö omukwatöma kwo̧'wo̧ tjo̧kekwaduwa chömöledö. Jau chömöledö, kwo̧'wo̧ tjo̧bekwökönö, kwo̧'wo̧ luwo̧ ösöwachibanö kwö̧jaduwobö jo̧be, Cristokwö bakobe usula emawadösa, jö̧ba̧lö. Jau chömöledö, jo̧bakwö bakobe usula emawadöja babema, tupakwö iteda ujulu öwawachibenama, kwo̧'wo̧ ösöwaduwachibanö kwö̧jaduwakobetjö̧.

Ja̧danö, öpöjödökönö, kwo̧'wo̧ ösöwanö kwejuduwinö tebatö kwite'ada̧laduwodönö kwömöledöduwinöma.

Jo̧kwajabetjö̧ chömöledö, Dios ökwödö usula kwemawaduwobö ösöditjö̧ma, Diosnö kwo̧'wo̧ wana̧lö usula emawö jwaikwöda otiwanö ja̧bö kwö̧jaduwo chömöledö, ökwödönö otidinama, jö̧a̧linadanö do̧'wo̧ luwo̧nö ite'ada̧lakwo̧ jö̧ba̧lö.

Ja̧danö chömöledö, Cristoma mölejȩbe ȩwa̧jakwa̧ abönö iteba'otjö usula emawinobe, ¿jö̧tö? Jau chömöledö, jo̧bama usula emawinobe, jo̧kwaijayonö usula emawijayonö jwaikwöda otiwanö ja̧bö ö̧jinobe, ¿jö̧tö? Ja̧danö, jo̧ba jejenö usula emawö jwaikwöda otiwanö ja̧bö ö̧jinobetjö̧, ökwödö babe usula emawadöma jo̧ba omukwatinadanö domukwataduwo chömöledö. Wanedö yötawa: Jo̧ba omukwatinama 'dudawaduwo, jo̧ba otiwanö ja̧bö ö̧jinadanö ökwödöbi otiwanö ja̧bö dö̧jakobetjö̧. Jau chömöledö, ökwödö Cristonö dösödobetjö̧ usula emawadöma sulabenö ja̧bö dö̧jina ida̧ökö kabatibinadösa, tupakwö diteba'onö dö̧jakwa̧ma jojodö ösödö ja̧tji̧danö ja̧bökönö, Diosda ösödi̧danö ja̧bö dö̧jakobetjö̧.

Jesúsnö ösödadö kwö̧jaduwobetjö̧ ökwödönö sulabenö yötja̧lena chömöledö. Jo̧kwaijayonö jejenö yötja̧liawö̧ kwo̧'wo̧ tjo̧achaduwoböma jwia, kwo̧'wo̧ ösöwanö kwö̧jaduwobö jo̧be chömöledö, Dios O̧'wo̧ Luwo̧ dejatinö juluwo̧ma ökwödönö pjabatö jo̧ jö̧ba̧lö.