Popular Bible Verses from 1 Corintios 12

Share

Jau chömöledö, Dios O̧'wo̧ Luwo̧ma bakwo̧nökwena do̧'wo̧ luwo̧nö jo̧, ¿jö̧tö? Ja̧danö, do̧'wo̧ luwo̧nö ja̧nö, ökwödönötjö iteda ujulu wainökwena i̧sekwobe chömöledö, okobe deinö bakobe pjadatakwawo jö̧ba̧lö.

Jau chömöledö, yötawaja̧ma baikwö labebö lobö yötawa: Ökwödöma Cristo iteba'obedöja, ja̧danö okobe deinö bakwo̧nökwena Cristo iteba'o jawa kwö̧jaduwobe.

Ja̧danö, diteba'o jawatjö bakwöta jawa usula emawitjö̧ma, okobe jwiinö diteba'oma usula emawobe chömöledö. Ja̧danö wanedö yötawa: Bakwöta jawa Aaa, ja̧ma otiwa jö̧ba̧lö tjomukwatenama, okobe jwiinö diteba'oma o̧'wo̧ ösöwanö ösödö jo̧be ichejekwa.

Ja̧danö, Dios O̧'wo̧ Luwo̧ma bakwo̧nö iyena, jojodönö waisanö lȩekwa yöawo jö̧ba̧lö. Ja̧danö, jelo̧nö waisakwawa ji̧ wene yöawo jö̧ba̧lö iyo̧ma jo̧bada, Dios O̧'wo̧ Luwo̧da. Ja̧danö, Dios O̧'wo̧ Luwo̧ma bakwo̧dajayonö, bakwo̧nö iyena jwaikwöda Dios yöawi̧ ösödo jö̧ba̧lö. Ja̧danö jelo̧nö ujulu iyena, ö'wöchadönö otidö loo jö̧ba̧lö. Dios O̧'wo̧ Luwo̧ma bakwo̧nö ujulu iyena, jojodö edajitjökö jawa i̧sebo jö̧ba̧lö. Ja̧danö, jelo̧nö iyena Dios yöawi̧ yöawo jö̧ba̧lö. Ja̧danö, jelo̧nö iyena ju'wedö yötjawi̧ a̧ja̧kwö Dios yöawi̧da yötjawojobö, jelo̧ yöawi̧da yötjawojobö öwaiso jö̧ba̧lö. Ja̧danö, jelo̧nö iyena, ju'wedö tjiwene wajwii̧ iwenenö waisachökönö yöawo jö̧ba̧lö. Ja̧danö, jelo̧nö iyena, wajwii̧ tjiwene yötja̧li̧ a̧ja̧kwö, jweinö labebö lobö yöawo jö̧ba̧lö.

Jejenö wainökwena iyijayonö, iyo̧ma bakwo̧da, Dios O̧'wo̧ Luwo̧da. Ja̧danö, jo̧bada ösödi̧danö okobe deinö bakwo̧nökwena wainökwena iyo̧, jo̧ba ujulunö ja̧bö tjö̧jo jö̧ba̧lö.

Ja̧danö, wanedö yötawa: Jejenö otidö ujuninobetjö̧, diteba'o jawama ju'wi diteba'o jawakwö ölakwabikwawokobe chömöledö. Ja̧danö, okobe jwiinö diteba'o jawama bakwainö omukwatö, ju'wi diteba'o jawa te'ada̧lö jo̧be ichejekwa.

Ja̧danö, baikwö yötawa: Dios iteda i̧tji̧mu ja̧bö tjö̧jo iyi̧ma nöinö jo̧be, jo̧kwaijayonö iyo̧ma bakwo̧da, Dios O̧'wo̧ Luwo̧da. Ja̧danö, bakwo̧nökwena böjȩnö ja̧nö wainökwena dotidobe, jo̧kwaijayonö Duluwo̧ma bakwo̧da. Ja̧danö, bakwo̧nökwena wainökwena dujulu juna̧ladösa Dios wei̧ ja̧bö dö̧jo jö̧ba̧lö. Jo̧kwaijayonö Diosda ökwödönö dujulu iyo̧ma, wainökwena dotido jö̧ba̧lö.

Ja̧danö, okobe deinö iteda ömöledö, Cristo iteba'obedönö otidö ujuninobe Diosma, baikwö yötawa: Abönö Jesús webawedönö ujuninobe, ikenama Dios yöawi̧ yöbawadönö ujuninobe, ikenama Jesúsnö ösödadönö ba̧ja̧dadönö ujuninobe, ikenama jojodö edajitjökö jawa ja̧badönö ujuninobe. Ikenama jojodö tjö'wöchi̧ otidö lobadönöbi, ja̧danö jojodönö pjabatadönöbi, ja̧danö luwedö baibanö otidadönöbi, ja̧danö ju'wedö tjiwenenö yöba̧ladönöbi ujuninobe.

Chömöledö, bakwo̧ iteba'oma, bakwöta jawadaokobe, ¿jö̧tö? Nöinö jo̧be bakwo̧ iteba'o jawama, ¿jö̧tö?

Jau chömöledö, diteba'o jawatjö mikwawökö ji̧ jö̧ba̧lö döpöjödi̧ jawama, dösödi̧ jawatjö o̧penönö mikwawobe ichejekwa. Ja̧danö, julu jwii̧ jö̧ba̧lö döpöjödi̧ jawama, ja̧ jawa jwiitjö̧ma dö̧jobö jwiena, inesö mikwawobetjö̧.

Chömöledö, bakwo̧ iteba'oma okobe jwiinö bakwai̧da öbajaleda ji̧tjö̧ma, ¿dakwö a̧ja̧kwobö? A̧ja̧kwökena, ¿jö̧tö? Ja̧danö, iteba'oma okobe jwiinö bakwai̧da ölakiyuda ji̧tjö̧ma, ¿dakwö 'dö̧atobö? Jo̧kwaijayonö, okobe jwiinö bakwöta jawa baibanöma otidinokobe Diosma chömöledö, okobe jwiinö tjiteba'o jawa wainökwena iteda ösödi̧danö otidö ujuninobe. Jau chömöledö, tjiteba'oma okobe jwiinö bakwöta jawada ji̧tjö̧ma, tjiteba'oma jwiena ichejekwa, bakwöta jawadaobetjö̧, ¿jö̧tö?