Popular Bible Verses from 1 Crónicas 16

Share

Isabenö Jo̧nö do̧'wo wa̧na̧lö dö̧jaduwo, —Duluwo̧ma isabenö juluwo̧, —jö̧ba̧lö. Ba̧kwelöjatebö Isabenö Jo̧ öba a'o dö̧jobö disakwaduwo.

Isabenö otiwo̧ duluwo̧ Isabenö Jo̧ma, isabenö otiwanö dö̧jibinö pjabato̧, ja̧danö ile nieba̧wö̧nö kabatibökönö, jwaikwöda ile nibebö jo̧. Jo̧kwajabetjö Isabenö Jo̧nö ösödö, —Otiwanö pjabato̧ja, —yöda̧lakwawaduwo chömöledö. Ja̧danö wene döbaledenama, jo̧banö adebaduwo, —Dö̧ji̧binö pjabato̧ Dios, dö̧jibinö pjakatobö adebakwö, tjitebokwena jojodö tjö̧'da̧de pjelekwachadö dö̧jelö, ökwödönö kwo̧ko̧ko̧dobö, ja̧danö ko̧ko̧dajo̧ ditebobe tjekatobö adebakwö. Jau duluwo̧, jobekwö pjakatobö adebakwö, pjakatajawö̧ do̧'wo ösöwachibanö ökwönö dösödakobetjö̧, –Isabenö Jo̧ma otiwanö dö̧jibinö pjaatajabe, –jö̧ba̧lö ökwönö dösödakobetjö̧, —jö̧ba̧lö Isabenö Jo̧nö adebaduwo.

Isabenö Jo̧nö dösödaduwo, —Duluwo̧ Isabenö Jo̧, otiwanö pjabato̧ja, —jö̧ba̧lö. Tjitebokwena jojodönö yödawaduwo, Isabenö Jo̧ otiwanö pjaataja̧ jawama.

Isabenö Jo̧ ömöledö dö̧jobetjö̧, do̧'wo ösöwachibanö yöda̧laduwo, —Otiwanö Isabenö Jo̧ ömöledösa, —jö̧ba̧lö. Okobe deinö Isabenö Jo̧nö isakwö ösödadöma, do̧'wo ösöwachibanö dö̧jaduwo.

Do̧'wo jwibibökönö, inesö otiwa jawa otidina domukwatibaduwo. Iteda ujulu i̧sȩbö, döpöjojodönö lȩebina jawa domukwatibaduwo.

Isabenö Jo̧nö lo̧daduwo, —Otiwo̧ja, —jö̧ba̧lö lo̧daduwonö. Iteda ujulu i̧sȩbina, jojodö edajitjökö jawa i̧sȩbinama yödawaduwo.

Isabenö juluwo̧, duluwo̧ Isabenö Jo̧ Diosma. Isabenö mikwawo̧, —Juluwo̧ja, —jö̧ba̧lö jo̧banö dösödobö. Jau, okobe deinö ju'wedö tjösödawö̧tjö bajalekwönönö, yebabinö omukwatö dösödo jö̧da̧lökwema Isabenö Jo̧ Diosda.

Isabenö mikwawo̧ Isabenö Jo̧ Diosma, —Juluwo̧ja, —jö̧ba̧lö jo̧banö dösödobö. Jo̧kwajabetjö̧, —Juluwo̧ja, —jö̧ba̧lö, kwiyaduwakwa̧ ichejebö, öba a'o kwichibaduwo, dewinö dejato̧, suli̧tjö 'da̧bachibö jo̧ Isabenö Jo̧nö bȩbachibö kwösödaduwo.

Isabenö dejatinö juluwo̧, ja̧danö isabenö la'aka luwo̧bo̧ dösödökwe Isabenö Jo̧ma, iteda ö̧jelö inesö juluwi̧ i̧sȩbo̧, ja̧danö tjo̧'wo ösöwachibanö pjabato̧.

Bö̧jȩ ba̧kwemeachibanö ju̧kwadö Isabenö Jo̧nö ösödö lo̧daduwo. Mölekwena otiwanö pjaataja̧ wene yödawaduwo, —Isabenö Jo̧ma dö̧jibinö pjabato̧, —jö̧ba̧lö.

Tjitebokwena jojodönö yödawaduwo, —Isabenö Jo̧ma dejatinö juluwo̧, —jö̧ba̧lö. Okobe deinö tjitebokwena jojodönö yödawaduwo, iteda ujulunö jojodö edajitjökö jawa i̧sȩbinama.

—Ötjöda chömöledö batjibanö omudawö chujuninawö̧nö sulabenö ja̧bökönaduwi, ötjöda yötawi̧ yöbawadönö suli̧ waedökönaduwi, —jö̧ba̧lö lȩbebö weinobe la'aka luwedönö.

Isabenö mikwawöködö ju'wedö tjösödawö̧ma, sule o̧'wo jawadatjobetjö̧. Jo̧kwaijayonö dösödökwe Isabenö Jo̧ma, mölȩjȩ otidina, isabenö mikwawo̧ jo̧bama.

Isabenö Jo̧ma la'akatjöda iteda yöbawö ujunina wenema o̧'wo jwibibö̧kö̧, inesö lekwe mölȩ baibanö, tjö'dö̧dö̧ tjö̧'dö̧dö̧nö ba̧kwȩlöjatebö 'dö̧bibajökönö 'yatjebijayonö, tja'dödönö yöbawö ujunina wene ba̧kwelöjatebö omukwato̧ Isabenö Jo̧ma.

Mölȩjȩnö ju̧kwadöbi, bö̧jȩnö ju̧kwadöbi okobe deinö do̧'wo ösöwachibanö dö̧jaduwo. Do̧'wo ösöwachibanö tjitebokwena jojodönö yödawaduwo, —Isabenö Jo̧ma webö jo̧, —jö̧ba̧lö.

Isabenö Jo̧ ökwödö israel jojodö dösödökwe Diosma ba̧kwelöjatebö jo̧, ajayitjödabi, 'dö̧bibajökönöbi ba̧kwelöjatebö jo̧. Jo̧banö dösödaduwo chömöledö, —Otiwo̧ja duluwo̧, —jö̧ba̧lö, Levisaso jojodö lo̧tjobö weinobe Davidma. Ja̧danö lo̧tjaja̧ a̧ja̧kwajadö, okobe deinö jobe ju̧kwadö israel jojodöma ösödö yötja̧linobe, —Otiwa, Amen, —jö̧ba̧lö, ja̧danö Isabenö Jo̧nö tjösödinobe.

Isabenö Jo̧ ujulu yökawaduwo ö̧kwödö tjitebokwena jojodöma, —Isabenö Jo̧ma dejatinö juluwo̧, —jö̧ba̧lö, jweinö yökawaduwo.