Popular Bible Verses from Ayṯ-Ruma 1

Share

Aqa nec war tseḏḥiɣ ca zi Lʼinjil liʼanna Lʼinjil ḏ jjheḏ nni ig isxeddam Arebbi bac aḏ isenjem marra wi ɣa yamnen: Ayṯ-Israʼil ḏ imezwura ṯumma yinni war iǧin ca zi Ayṯ-Israʼil.

Arebbi isbeyyen-aneɣ-d ḏi Lʼinjil mammec ɣa nemṣȓaḥ akiḏes, manaya s lʼiman waḥḏes. Mammec iqqar Lkitab: <Wenni iǧan nican aḏ iƹic s lʼiman.>

Zeg wami ṯeǧa ddunect-a, min war itwaẓerren n Arebbi iƹni jjheḏ nnes itduman ḏ ṭṭabiƹa nnes yuƹȓan, nfehhem-iṯent nẓerr-iṯent mliḥ ḏi ṯmesȓayin itwaxeȓqen. Ƹlaḥsab manaya iwḏan war ɣarsen bu lƹuder.

Waxxa niṯni tuɣa ssnen Arebbi, walakin war ṯ ḥemmiḏen ca war ṯ ṯcekkaren ca mammec itxeṣṣa aḏ ggen ak Arebbi. Lʼafkar nsen ḏewȓent xwant, uȓawen nsen ḏ ibuhaȓiyen ḏewȓen ḏ ṯaǧest.

Kkaren beddȓen lḥaqiqa n Arebbi s ixarriqen. Ƹebbḏen xeddmen i min d itwaxeȓqen maci i Arebbi Lxaliq, wenni iy ḏi ṯeǧa lbaraka i ȓebda n ȓebdaṯ. Amin.

Fa imeḍhar-d uɣḍab n Arebbi zeg ujenna x marra ccarr ḏ ȓbaṭeȓ iy teggen yiwḏan iƹni yinni itbeṭṭaȓen lḥaqiqa s ccarr nsen.

Ṯumma isellem-iṯen Arebbi i ccehawaṯ nsen iy ṯen ifeḍḥen. Kkarent ṯemɣarin beddȓent iryazen s ṯemɣarin. Uȓa ḏ iryazen kkaren semḥen ḏi ṯemɣarin, ṯekkar ḏaysen ṯmessi ijjen x unneɣni, aryaz ifesseḏ ak uryaz. S manaya jebḏen-d lƹiqab i yixef nsen iy sḏaheǧen x ȓmunkar iy teggen. Ssenni niṯni wami ugin aḏ ssnen Arebbi, isellem-iṯen i ȓaƹquȓaṯ nsen infeḍḥen aḏ ggen min war iḥȓin.

Ḥessben x yixef nsen ḏ imiɣisen, niṯni ḏewȓen ḏ ibuhaȓiyen. Beddȓen lƹaḍama n Arebbi iddaren i ȓebda s lʼaṣnam itcabbahen ḏeg iwḏan iy ɣa ifnan, ḏ lʼaṣnam itcabbahen ḏeg yijḍaḍ ḏ lḥayawanaṯ ḏ min itenḥuruḏen.