ଇଞ୍ଜାଁ, ଇସ୍ରାୟେଲ ଲ଼କୁ ଏ଼ୱାରାଇଁ ଏଲେଇଚେରି, “ଆୟ଼ତା ମା଼ମ୍ବୁ ଏଚିବେ଼ଲା ଊଙ୍ଗା ଡ:କା ଦାରି କୁଗାହାଁ ବାଣ୍ଡି ପାଞ୍ଜେ ରା଼ନ୍ଦା ତିଞ୍ଜିମାଚମି, ଏଚିବେ଼ଲା ମା଼ମ୍ବୁ ମିସର ଦେ଼ସାତା ପ୍ରବୁ କେୟୁତା ହା଼ତମିମା। ମୀରୁ ଈ ବାରେ କୁଲମିତି ହାକିଟି ପା଼ୟାଲି ତାକି ମାଙ୍ଗେ ହ଼ପ୍ହାଁ ଈ ବାଟାତା ତାଚାମାଞ୍ଜାଦେରି।”
ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, “ମେହ୍ମୁ ନା଼ନୁ ମିଙ୍ଗେ ତାକି ହା଼ଗୁ ଲାକଟି ତିନି କା଼ଦି ହିୟାଇଁ; ଇଞ୍ଜାଁ, ଲ଼କୁ ବାରେ ପାଙ୍ଗାତା ହାଜାହାଁ ଦିନାତାକି ଦିନା, ଏଚେକା ଲ଼ଡ଼ା ଆ଼ନେ ଏଚେକା କା଼ଦି କୂଡ଼ି କିନେରି; ଏଚେଟିଏ ଏ଼ୱାରି ନା଼ ମେ଼ରା ଲେହେଁ ତା଼କିନେରି କି ଆ଼ଏ ନା଼ନୁ ଏ଼ୱାରାଇଁ ଈଦାଆଁ ତଲେ ତାୟିପାରି କିଇଁ।