Ekero narigereretie nkarora ekembugu‐mbugu gekorwa sugusu. Riire rinene riaare gwoka omorero rigacha, na obomeka‐meku bokarietanana ase chinsemo chionsi. Boigo korwa ime ase omorero oyio, obomeka‐meku bonga buna obw’etahabu bokarorekana. Korwa ase egati y’omorero oria bikarorekanao ebitongwa bine bire moyo. Oko nakwo kwarenge okororekana kwabo: Nigo biagwekaine mwanyabanto, korende kera ekemo nigo kiabwate amasio ane, ne chimbaba inye. Amagoro abo nigo arongeete, na ebisanyi bi’amagoro abo nigo biagwekaine ebi’emori. Ebitongwa ebio nigo biarenge komeka‐meka buna etaai ekomeka‐meka. Inse ye chimbaba chiabo, ase chinsemo chiabo inye, nigo biabwate amaboko buna aya mwanyabanto. Amasio abo ne chimbaba chiabo nigo biarenge iga: Chimbaba chiabo nigo chiakunaine, na ebitongwa biria tibiarenge koonchoka, korende bikaba bikogenda gochia bosio rioka.