Popular Bible Verses from निर्गमन 20

Share

“अवं तेरो परमेशर यहोवा आईं, ज़ैने तू मिस्र मुल्खेरी गुलैमी मरां केढतां आनोरोस। “तू मेरे अलावा होरि कोन्ची परमेशर केरतां न मेन्नां।

“तू अपने लेई घड़ाई केरतां कोई मूरती न बनेइयां, न कोन्चेरी शकल बनेइयां, ज़ै आसमाने मां या धेरती पुड़ या धेरतरे पैनी मां भोए। तू तैन कां न झुकां, ते न तैन केरि आराधना केरां, किजोकि अवं तेरो परमेशर यहोवा जलन रखनेबालो परमेशर आईं, ते ज़ैना मीं सेइं बैर रखतन, तैन केरे मट्ठन, पोट्लड़न, ते पड़पोट्लड़न भी सियानां केरि सज़ाह देताईं

“तू अपने अम्मा-बाजी केरि आदर केरां, ज़ैस सेइं ज़ै मुल्ख तेरो परमेशर यहोवा तीं देते तैस मां तू बड़े दिहाड़न तगर ज़ींतो रालो।

“तू थैकरी दिहाड़ी पवित्र मेन्नां याद रेखां।

“तू अपने परमेशरेरू नवं बेफैइदू न ज़ोइयां, किजोकि ज़ै कोई यहोवारू नवं बेफैइदू ज़ोते दोषी ठहरालो।

हफतेरे शा दिहाड़े त तू मेहनत केरतां अपनु सब कम-काज़ केरां। पन सत्तोवं दिहाड़ी तेरे परमेशर यहोवारे लेई थैकरी दिहाड़ीए। तैस मां न त तू कोन्ची किसमेरू कम काज़ केरां, ते न तेरू मट्ठू, न तेरी कुई, न तेरो नौकर, न तेरी नौकरानी, न तेरे जानबर, न कोई परदेशी ज़ै तेरे घरे मां भोए।

“तू केन्चेरे घरेरू लालच़ न केरां, न केन्चेरी कौन्शरू लालच़ केरां, ते न केन्चेरे नौकर-नौकरानी, या दांत या गधेरू, न केन्चेरी कोन्ची चीज़रू लालच़ केरां।”

“तू अपने पड़ोसेरे खलाफ झूठी गवाही न देइयां।

“तू व्यभिचार न केरां।

“तू कत्ल न केरां।

“तू च़ोरी न केरां।