Popular Bible Verses from Roma 8

Share

Orang yang sayang pa Tuhan Allah, tu orang yang Tuhan Allah so pangge for iko tu De pe mau, apa jo yang da jadi pa dia biar itu bae ato nyanda, torang tau Tuhan Allah beking samua itu jadi bae for dia.

Kita yakin skali biar torang mati ato torang hidop di dunia ini, biar malaekat-malaekat ato setang-setang mo beking bagimana, biar ada hal apa jo tu da jadi skarang ato nanti, biar tu kuasa yang di langit deng di bumi ato apa jo yang Tuhan da ciptakan mo beking bagimana, itu samua nyanda mo beking torang tapisa deng Tuhan Allah pe sayang yang torang so dapa lantaran Kristus Yesus tu torang pe Tuhan.

Waktu torang nyanda kuat, tu Tuhan Allah pe Roh yang bantu pa torang. De pe conto bagini: waktu torang basombayang, torang nintau apa tu torang musti bilang pa Tuhan, mar tu Roh yang tolong pa torang for kase tau tu torang mo bilang pa Tuhan Allah. Tu Roh itu yang kase tau pa Tuhan deng cara yang torang sandiri nyanda mampu mo bilang deng kata-kata.

Kalu inga samua yang Tuhan so beking for torang, torang yakin Tuhan Allah ada sama-sama deng torang. Jadi sapa dang yang mampu malawang pa torang? Nyanda ada to?

Tuhan skarang so nyanda lei mo kase hukuman apa-apa pa torang lantaran torang ini orang-orang yang so percaya pa Kristus Yesus.

Tu orang-orang yang pikir-pikir tu keinginan manusia, dorang itu no tu mo dapa hukuman tapisa deng Tuhan slama-lamanya. Mar kalu orang-orang yang pikir-pikir tu Tuhan pe Roh, ada rasa tenang pa dorang pe hati, deng dorang lei mo hidop slama-lamanya deng Tuhan.

Mar biar lei torang mo dapa samua tu susa, torang tetap mo menang luar biasa dari samua itu lantaran Kristus sayang pa torang.

Kita yakin kalu tu pendritaan yang torang da rasa skarang ini nyanda ada arti apa-apa kalu mo se banding deng tu hidop yang luar biasa yang Tuhan nanti mo kase pa torang.

Nyanda ada yang bole mo kase pisa pa torang dari Kristus pe sayang. Biar torang mo dapa tu susa, siksa, aniaya, kelaparan, nyanda ada baju, cilaka ato lei mo dapa bunung, biar samua bagitu Kristus tetap sayang pa torang.

Tuhan Allah yang tau manusia pe isi hati, Dia tau apa tu Roh da bilang itu pe maksut. Soalnya apa yang tu Roh da bilang pa Tuhan for Tuhan pe orang-orang, itu iko Tuhan Allah pe mau.

Samua orang yang kase tu dorang pe diri supaya Tuhan Allah pe Roh pimpin tu dorang pe hati, so dorang itu no tu Tuhan Allah pe anak-anak.

Orang-orang yang hidop iko tu keinginan manusia, dorang itu pikir-pikir tu keinginan duniawi. Mar tu orang-orang yang hidop iko tu Tuhan pe Roh, dorang itu pikir-pikir tu hal-hal yang beking snang pa Tuhan.

Dia pe Anak sandiri, Dia nyanda tahang mar Dia kase sampe mati for torang. Jadi Tuhan Allah pasti mo kase pa torang samua yang torang perlu.

Torang tau kalu torang ini Tuhan Allah pe anak-anak lantaran tu Roh yang da se yakin pa torang pe hati. Jadi kalu torang ini Tuhan Allah pe anak-anak, torang lei jadi Dia pe ahli waris, itu de pe arti torang ini ada hak for mo trima samua tu Dia so se sadia for De pe anak-anak. Kong torang mo dapa itu sama-sama deng Kristus supaya torang lei dapa puji deng hormat sama-sama deng Dia. Mar kalu torang suka mo dapa itu, torang lei musti mendrita lantaran da iko pa Tuhan sama deng Kristus so mendrita.

Soalnya kalu orang-orang yang pikir-pikir tu keinginan manusia, dorang itu yang ja malawang pa Tuhan Allah. Jadi dorang nyanda ja iko tu Tuhan Allah pe atoran lantaran memang dorang nyanda mampu mo iko itu.

So itu, samua yang Tuhan Allah da ciptakan di dunia ini samantara da tunggu-tunggu deng snang hati tu waktu Tuhan mo se tunjung kalu torang yang percaya itu De pe anak-anak.

Kong samantara batunggu Tuhan mo beking samua mo jadi baru ulang, torang tau dari dulu sampe skarang ni bumi deng de pe isi susa deng sengsara, sama deng tu parampuang yang da saki skali waktu so dekat-dekat de pe anak mo lahir.