Popular Bible Verses from 2 Timotius 4

Share

Kita so beking tu kita pe tugas yang bae ini, itu sama deng kita da iko pertandingan deng bae. Kita beking ni tugas deng karja kras sampe klar, sama deng atlit yang da iko lomba lari sampe di finis. Kita beking samua itu deng kita tetap percaya pa Tuhan.

kase tau tu Tuhan Allah pe firman pa orang-orang. Biar bagimana tu keadaan ngana musti slalu siap ja kase tau trus tu firman pa dorang. Ngana musti kase tau pa dorang kalu beking sala, ngana togor pa dorang supaya brenti beking tu sala, deng lei ngana kase nasehat pa dorang. Kong deng sabar ngana mangajar pa dorang.

Ngana beking samua itu lantaran nanti ada de pe waktu, orang-orang nimau mo dengar tu ajaran yang butul, malatare dorang mo pangge guru-guru yang dorang suka. Tu guru-guru itu cuma mo bilang pa dorang tu hal-hal yang dorang suka mo dengar. Dorang nimau mo dengar tu ajaran yang butul, dorang lebe suka mo dengar dongeng-dongeng.

Mar ngana komang Timotius, ngana musti tetap kuasai tu ngana pe diri di samua keadaan. Kalu ngana beking tu ngana pe tugas kong dapa siksa, ngana musti tetap batahang. Ngana ini penginjil tu orang yang ja kase tau tu Kabar Bae pa orang yang blum dengar itu, kong ngana musti beking bae-bae sampe klar tu ngana pe tugas yang Tuhan da kase pa ngana itu.

Kalu orang iko lomba kong juara, dia dapa piala. Bagitu lei deng kita, Tuhan so kase sadia piala for kita lantaran kita da beking tu butul di muka pa Dia. Tu piala itu Dia da simpang kong nanti Dia mo kase pa kita di hari Dia mo adili samua orang. Tu piala itu bukang cuma kita yang mo dapa mar samua orang percaya yang da tunggu-tunggu Dia datang ulang ka dunia ini lei. Torang pe Tuhan ini memang Hakim yang adil.