Popular Bible Verses from 2 Timotius 1

Share

Soalnya Tuhan Allah nyanda kase roh panako pa torang, mar Dia kase roh yang beking torang pe hati jadi kuat, torang bole basayang pa orang laeng deng lei beking torang bole kuasai tong pe diri.

Tuhan Allah yang so se slamat pa torang deng pangge pa torang supaya hidop deng hati yang bersi. Dia beking itu samua bukang lantaran torang ja beking tu bae, mar lantaran Dia pe rencana dari dulu deng Dia se tunjung tu Dia pe sayang pa manusia. Memang dari dulu waktu Tuhan Allah blum beking ni dunia, Dia so rencana kase tunjung tu De pe sayang pa manusia lewat Kristus Yesus.

So itu kita kase inga supaya ngana tetap smangat pake tu karunia yang Tuhan Allah so kase pa ngana. Tu karunia itu yang ngana da dapa tempo hari dari Tuhan Allah waktu kita da taru tangan pa ngana, supaya ngana mampu beking tu tugas yang Tuhan da kase pa ngana.

Jadi ngana jang malo basaksi tentang torang pe Tuhan. Ngana lei jang malo lantaran kita tu ngana pe tamang ada di bui, soalnya kita ada di bui lantaran ja layani pa Tuhan. Ngana lei musti siap-siap dapa siksa sama deng kita lantaran torang ja kase tau tu Kabar Bae tentang Dia, kong Tuhan Allah mo kase kuat pa ngana for beking itu.

Kita da beking kita pe tugas itu, so itu kita dapa siksa rupa ini. Mar biar lei bagitu, kita nyanda malo. Soalnya kita kanal Tuhan yang kita percaya, deng kita yakin kalu Dia ada kuasa for jaga tu tugas yang Dia so kase percaya pa kita sampe nanti hari kiamat, tu hari Tuhan mo adili pa samua orang.