Popular Bible Verses from 2 Korintus 6

Share

Ngoni yang percaya pa Tuhan, ngoni jang ada hubungan dekat deng tu orang-orang yang nyanda percaya. Co ngoni pikir, tu orang yang ja beking tu butul di muka pa Tuhan deng lei tu orang yang ja beking tu jaha, pa dorang dua itu pasti nyanda ada yang sama. Kong biasanya, tu trang pasti nyanda mungkin to bole mo jadi satu deng glap?

Apa de pe hubungan antara tu Tuhan Allah pe Ruma Ibada Pusat deng tu opo-opo pe kuil? Nyanda ada to? Soalnya torang tu orang-orang percaya, torang ini no tu Tuhan Allah pe Ruma Ibada Pusat, lantaran Tuhan Allah yang hidop itu ada di tenga-tenga pa torang. Ini sama deng tu Tuhan Allah da bilang di Kitab Suci, “Kita mo tinggal sama-sama deng dorang, deng hidop di tenga-tenga pa dorang, kong Kita mo jadi dorang pe Tuhan Allah, deng dorang mo jadi Kita pe orang-orang.”

Kong Tuhan Allah da bilang lei bagini, “Kaluar jo ngoni dari antara pa dorang tu orang yang nyanda percaya, bapisa jo dari pa dorang itu. Jang ngoni beking dosa yang beking ngoni jadi najis, trus Kita mo trima pa ngoni. Kong Kita mo jadi ngoni pe Bapa, trus ngoni lei mo jadi Kita pe anak laki-laki deng Kita pe anak-anak parampuang.” Itu no tu Tuhan da bilang di Kitab Suci, Dia itu yang Mahakuasa.

Kristus deng tu Belial tu setang pe bos, dari pa dorang dua itu nyanda ada yang sama. Bagitu lei deng tu orang-orang yang percaya pa Tuhan deng tu orang-orang yang nyanda percaya, dari pa dorang itu pasti nyanda ada yang sama.