Popular Bible Verses from Titus 3

Share

Taan intarépé', aituru'o i Amang Kasuruan si Lumolowirta eng kasamaan-Na wo eng kaupusan-Na a sé pakasa in tou. An tutuw itu Sia lumowiro icita, en itu ra'ica ampa'paan kita mengaéma' im butul an dior-Na taan ampa'paan aituru'-Nao eng kaupusan-Na ai cita. Weresin-Na eng kamesé-meséaanta wo pakén-Na e Roh Le'nas e méma' ing katouanta maweru. En itu meputé kita tumou sumawel. Sia ka'i mééo mai i Roh-Na ai cita ang karapi i mawuta-wuta maké si Yesus Kristus si Lumolowirta. E Roh ituo e meresi ing kamesé-meséaanta. Aitambér-Nao mai en upus-Na wosama' kita anggapen-Na wutul an dior-Na wo ro'na makéré ing katouan akar ing kauré-uré, kiit im paara-arapenta.

Éi Titus, ita'néimu mangé a sé tou maéman am pakasa in jamaat wosama' séra mengalinga wo mengaéma' sapa sé airu'du' é maperénta wo sé makakawasa i negara. Séra musti le'tek maéma' in loor a sé tou walina. Musti ita'néimu mangé ai séra, ra'ica toro mengawuruk i ngaran é tou walina wo ra'ica toro meindo-indoan roma'. Aweso taré em peri éra musti loor wo ka'i ko'kos en até a sé im pakasa in tou.

Wo ko ra'ica toro mapaar im papaaren sé ra'ica wana torona wo andumoro' in sisisilen taranak é apo-apo' miow, ra'ica toro meindo-indoan roma'. Wo ko ka'i ra'ica toro meréndéran andumoro' in ukum Torat. Ampa'paan pakasa en itu ra'ica wana torona wo uli-ulit ra'ica wana torona.

Musti ka'i romaanmu mangé si tou maéma' ing kapetanéan an jamaat. Sa makaruao sina'uenmu sia wo ra'ica kiimna luminga, tioo ko mekarapi wo isia.