Popular Bible Verses from Ibrani 11

Share

Sa kita awéan em paémanen a si Amang Kasuruan, émanenta sapaoka kéréanta oka sapa sé paarapenta. Ampa'paan im paémanen itu kailekanta sapaoka kéréanta oka sapa sé ra'ica ro'na kaséréanta. Ampa'paan awéan em paémanen, sé tou indior icasalé' i Amang Kasuruan.

Si tou ra'ica maéman a si Amang Kasuruan, sia ra'ica kawisa mako maarui in até-Na. Si tou mai a si Amang Kasuruan sia musti maéman sapaoka si Amang Kasuruan itu awéan, wo sia musti maéman ka'i sapaoka si Amang Kasuruan méé mai in laasa a sé tou sé uli-ulit mengaéré Sia.

Ampa'paan awéan paémanen akar ro'na kaangéanta sapaoka en tana' wo en langit wo pakasa sé an untepna niéma' i nunuwu' i Amang Kasuruan. Anaé, pakasa sé ro'na kaséréanta, niéma' asé sapa sé ra'ica kaséréanta.

Ampa'paan si Abraham awéan paémanen, kiniitanna si Amang Kasuruan an tutuw sia tinowa wo airu'du' mangé asi esa tampa si mamuali oka bagéanna. Wo sia mangé mandé ra'ica kailekanna am bisa en tampa angéanna. Ampa'paan im paémanenna, mandé ka'i sia maento' an tana' si aijanjio i Amang Kasuruan mamuali anuna, taan sia maento' am bitu tanuke' in tou manangkéi. Si Ishak wo Yakub ka'i mento' mewali-wali wo isia an ténda asaloke' i manangkéi, mandé ka'i séra tumerima in janji si meputé asi Casuruan owo.

Ampa'paan si Nuh awéan paémanen, sia kinuanan i Amang Kasuruan sapa sé mamuali oka sa, sé ra'ipé' sumangkum ako sinéréna, wo ang karapi ing katale'tekanna émaanna esa kapal wangker en lumowir sé pamaléna asi sonop wangko'. Wo in taniitu ituru'na sapaoka sé tou ang kayo'baan patus ukumen, wo sia in esa tinerima i Amang Kasuruan tanu tou nianggap wutul ampa'paan im paémanenna.

Ampa'paan si Henokh awéan paémanen, sia niangkai angé i Amang Kasuruan an sorga akar ra'ica sangkumenna em papaté. Wo ra'io ka'i wana tou en suméré isia, ampa'paan sia niangkaio mangé i Amang Kasuruan. Eng Kitap Le'nas méé ing kasairian sapaoka an tutuw sia ra'ipé' niangkai angé sia maarui in até i Amang Kasuruan.

Ampa'paan si Habel awéan paémanen, sia méé raragés binatang pinokol asi Amang Kasuruan sé lumoorai wo i raragés aiwéé i Kain. Ampa'paan si Habel awéan paémanen, akar sia tinerima i Amang Kasuruan tanu tou si nianggap wutul wo e raragés aiwééna tinerima i Amang Kasuruan. Mandé si Habel uréo imaté, taan ampa'paan im paémanenna, sia tanu maroma'pé' ai cita akar intarépé'.

Ampa'paan si Abraham awéan paémanen akar si Sara ro'na maowa-owak mandé ka'i sia matu'ao wo ra'io toro ka'i makéré toyaang. En itu imamuali ampa'paan si Abraham maéman sapaoka émaan oka i Amang Kasuruan sapa sé aijanji-Na.

Si Abraham ro'na talesen menonou taniitu ampa'paan sia ang karoro'an i maento-ento' ing kota makapandasi keter, si kota itu pawasa-wasano wangunen i Amang Kasuruan.

Ampa'paan si Musa awéan paémanen, tutuw sia imawangkoo ra'ica kiimna patuulen toyaang i mengala'un kolano Mesir, ampa'paan ra'ica kiimna menonou maaru-arui ang kamesé-meséaan si ang karoro'anke', taan icasalé'na mawendu mewali-wali wo sé tou i Amang Kasuruan. Si Musa kumélong en tumerima im pakasa ing kasiyaan a Mesir, wo en lébé icasalé'na iséro' ampa'paano im paémanenna a si Kristus si maai sa. Ampa'paan si Musa maarap in laasa iwéé oka i Amang Kasuruan ai sia. Ampa'paan im paémanenna, itela'una en Mesir ra'ica maindé' icae'bow i colano Mesir. Sia mawaya' melala'us makaséréke' an dior tanuoka makaséréo si Amang Kasuruan si ra'ica kaséréan itu.

Ampa'paan si Abraham awéan paémanen, airagésna si toyaangna Ishak tanu raragés an tutuw sia niuji i Amang Kasuruan. Iragés i Abraham si toyaangna in esa itu, mandé ka'i tinerimanao en janji-janji i Amang Kasuruan

Ampa'paan si Rahab si wéwéné sundal itu awéan paémanen, sia ra'ica mekiit pinaté kaputé é tou ang kotana sé ra'ica le'tek a si Amang Kasuruan, ampa'paan sinungkulna am baléna kerapi in elur sé mawere-weren é Israel.

Ampa'paan sé tou Israel awéan paémanen, séra lumewet in Ta'sic Réindang tanuoka malewet an tana' pera. Taan sé tou Mesir ituminep an ta'sic an tutuw éra ka'i imepé' lumewet.

Ampa'paan sé tou Israel awéan em paémanen, e ri'dir mésél ing kota Yerikho rume'ba kekawus éra maya' lumi'cir ing kota itu pitu ngando eng kauré.

Ampa'paan im paémanenna, iru'du'na sé tou Israel mesic in enda' i domba ang konséng im papalen am balé éra wosama' sé toyaang luluna tuama éra ra'ica patén i malaékat im papaté. Wo in taniitu sia iméma'o in endo wangko' Paska asi kumataré.

Ampa'paan si Yusuf awéan paémanen, an tutuwna tawio imaté, icuana sapaoka sé taranak Israel kumesot oka a Mesir. Wo aitaarna wosama' en du'i-ru'ina musti uwiten tutuw éra kumesot a Mesir.

Ampa'paan si Yakub awéan paémanen, an tutuw sia matawio imaté, kamangenna sé rua toyaang tuama i Yusuf esa wo si esa. Wo sia kumundu maapo' a si Amang Kasuruan makawangén an tempok im beka'.

Ampa'paan si Ishak awéan paémanen, kamangenna si Yakub wo si Esau andumoro' sé maai oka sa.