Popular Bible Verses from 1 Timotius 2

Share

Si Amang Kasuruan wayake' in esa, wo ka'i wayake' in esa e makawali sé tou a si Amang Kasuruan, Siao si Kristus Yesus. Sia isumarakano in owak-Na en tumu'bus im pakasa ing kamesé-meséaan é tou. Siituo eng kasairian i Amang Kasuruan si mamuali tuus asi oras si aitantu-Nao.

Kataré-taré sina'uenku kamu mekiupus angé an sombayang wo ipasombayang angé ka'i sé tou walina wo mengawéé mangé i makapulu'sama' a si Amang Kasuruan torona é pakasa in tou, torona é kolano wo sé kikiiten wangko' wosama' kita ro'na menonou ang kaeluran wo ang kaaruian. Wo wuta ing kale'tekan wo in siri' a si Casuruan, siituo si patus émaan é tou maéman.

Ampa'paano in itu, icasalé'ku wosama' am bisa-wisake' sé tuama mengasombayang angé ang karapi in até weresi a si Casuruan, ra'ica ang karapi in e'bow wo meindoan roma'. Taniitu ka'i wo sé wéwéné, mengakarai angé sé patus am beren é tou, masoma-soma mangé wo tioo tirayo, tioo maéma' im buuk megioo, makasondol i mas kuma'pa mutiara, kuma'pa mekarai ing karai sosor ulit em bééna. Taan aweso taré sé wéwéné itu mengapasung in owak éra ang karapi mengaéma' sé loor sé patus pengaémaan é wéwéné sé mangaku maapo' a si Amang Kasuruan.