Popular Bible Verses from Romabii 1

Share

Ejaakɛ mihiɛ gbooo Kristo Sanekpakpa lɛ he, ejaakɛ eji Nyɔŋmɔ hewalɛ ni akɛhereɔ mɔ fɛɛ mɔ ni heɔ yeɔ lɛ yiwala, Yudanyo lɛ tsutsu kɛ Helanyo hu.

Ejaakɛ no mli ajieɔ Nyɔŋmɔ jalɛ kpo yɛ, kɛjɛɔ hemɔkɛyeli mli kɛyaa hemɔkɛyeli mli, tamɔ bɔ ni aŋma lɛ akɛ, “Shi jalɔ ni tsɔ̃ hemɔkɛyeli nɔ lɛ yi aaana wala.”

Ejaakɛ ehenii ni anaaa ni ji enaanɔ hewalɛ kɛ nyɔŋmɔ ni eji lɛ fɛɛ lɛ, kɛjɛ jeŋbɔɔ mli beebe lɛ atsɔ̃ɔ enii ni efee lɛ anɔ ayɔseɔ ni anaa faŋŋ, no hewɔ lɛ, amɛbɛ naajiemɔ ko

ejaakɛ amɛle Nyɔŋmɔ moŋ, shi amɛwooo ehiɛ nyam akɛ Nyɔŋmɔ, ni amɛdaaa lɛ shi hu, shi amɛfee shwɛm yɛ amɛjwɛŋmɔi amli, ni amɛtsui ni kɔɔɔ sane sɛɛ lɛ ewo duŋ.

Amɛŋɔɔ Nyɔŋmɔ anɔkwale lɛ amɛtsakeɔ amale, ni amɛjaa ni amɛsɔ̃mɔɔ bɔɔnɔ lɛ yɛ bɔlɔ lɛ najiaŋ, bɔlɔ ni ajɔɔ lɛ kɛyaa naanɔ lɛ! Amen.

Ejaakɛ ajieɔ Nyɔŋmɔ mlifu kpo kɛjɛɔ ŋwɛi kɛbaa gbɔmɛi ni kɛ nishaianii tsĩɔ anɔkwale lɛ gbɛ lɛ amusubɔɔ kɛ nishaianii lɛ fɛɛ nɔ

Enɛ hewɔ Nyɔŋmɔ ŋmɛɛ amɛhe ehã hiɛgbejianii ahe hiɛdɔɔ lɛ; ejaakɛ adebɔɔ naanyobɔɔ ni ato lɛ, amɛyei lɛ etsake hiɛ ehã nɔ ni kɛ adebɔɔ gbɛjianɔtoo eyaaa; ni nakai nɔŋŋ amɛhii lɛ hu eshi amɛyei lɛ asɛɛ, ni amɛkɛ akɔnɔ ni naa wa nyiɛɔ amɛ diɛŋtsɛ amɛhe sɛɛ, ni hii kɛ hii tsuɔ hiɛgbejianii, ni amɛna amɛtɔ̃mɔ lɛ he nyɔmɔwoo ni sa yɛ amɛ diɛŋtsɛ amɛmli. Ni akɛni amɛbuuu akɛ esa akɛ amɛleɔ Nyɔŋmɔ lɛ, Nyɔŋmɔ hu ŋmɛɛ amɛhe ehã jwɛŋmɔ ni esaaa koni amɛfee nibii ni esaaa

Amɛtsɛ amɛhe nilelɔi, shi amɛtsɔ̃mɔ kwashiai, ni Nyɔŋmɔ ni gbooo lɛ anunyam lɛ amɛtsake amɛhã gbɔmɔ ni gboɔ lɛ subaŋ henɔ ko kɛ loofɔji kɛ kooloi naji ejwɛjwɛɛjwɛtsɛmɛi kɛ waamɔnii anɔ.