Popular Bible Verses from Matius 5

Share

Trada orang yang pasang plita baru tutup deng loyang, tapi de pasti taru plita di tempat yang tinggi supaya bisa kas trang smua orang di dalam ruma itu. Begitu juga kam pu trang harus kentara untuk smua orang, supaya dong puji-puji kam pu Bapa yang di surga waktu dong liat hal-hal baik yang kam bikin.”

Kam tu sperti trang untuk smua orang. Sperti kota yang ada di atas gunung, tra mungkin tasembunyi.

Orang yang pu hati bersi, dong untung skali, karna nanti dong yang liat Allah di surga.

Orang yang rindu kalo Allah pu mau jadi, dong untung skali, karna nanti Allah kas puas dong deng hal itu.

Tapi Sa bilang kam, sayang sama kam pu musu-musu trus doa dong yang siksa kam.

“Orang yang sadar kalo dong perlu Allah, dong untung skali, karna dong su jadi Allah pu orang-orang di Krajaan Surga!

Orang yang suka bikin orang baku damai, dong untung skali, karna nanti dong dapa sebut Allah pu anana.

Orang yang skarang rasa hati sedi, dong untung skali, karna nanti dong dapa hibur.

Orang yang dapa siksa karna ikut Allah pu mau, dong untung skali, karna dong su jadi Allah di surga pu orang-orang.

Orang yang suka kasian sama orang lain, dong untung skali, karna nanti dong dapa kasian dari Allah juga.

Kam untung skali, waktu kam dapa ejek baru dapa siksa karna kam ikut Saya, trus dong bicara smua yang jahat tentang kam padahal itu tra benar. Kam harus snang deng rasa syukur skali, karna kam pu hadia besar di surga, karna begitu juga nabi-nabi yang seblum kam su dapa siksa.”

Orang yang renda hati, dong untung skali, karna pasti Allah kasi bumi yang baru jadi dong pu milik.

“Kam tu sperti garam untuk smua orang. Tapi kalo de su tra rasa asin, bisa ka bikin de pu rasa asin lagi? Garam itu tra bisa pake untuk bikin apapa, jadi pasti dapa buang trus dapa injak dari orang.

Itu jadi, kam harus sempurna, sama sperti kam pu Bapa yang di surga juga sempurna.”

Kalo iyo, bilang iyo. Kalo tidak, bilang tidak. Apa yang lebi dari itu, de pu asal dari De Yang Jahat.

Kam su dengar ajaran tentang, ‘Mata ganti mata, gigi ganti gigi.’ Tapi Sa bilang kam, kam jang balas orang yang bikin jahat sama kam. Mala sapa saja yang tampar ko pu pipi kanan, kasi ko pu pipi kiri juga.

Kalo ko pu mata kanan bikin sampe ko bikin dosa, cungkil baru buang suda! Karna lebi baik ko pu anggota badan satu hilang, daripada ko pu badan deng lengkap dapa buang ke neraka. Kalo ko pu tangan kanan bikin sampe ko bikin dosa, potong baru buang suda! Karna lebi baik buat ko kalo ko pu anggota badan satu hilang, daripada ko pu badan deng lengkap masuk ke neraka.