Popular Bible Verses from Joroma 12

Share

Kur ilubunu kuo me piny ni, do miunu kuo wu lokere pi tam anyen kame itienu kede, me wek ingeunu gikame Rubanga mito, gikaber, kame yomo cunye kede kopoore.

Pi mano, imiegu kede amiegu na, akwao wu pi cuny me kisa ka Rubanga be, miunu komu bala giayala kame kuo, gikacil kame yomo cuny Rubanga. Manoni en woro Rubanga i ateni.

Lelunu pi gen wu, diunu cunyu i can kame itienu iye, bedunu di ilegunu nakanaka.

Kur imiunu gikarac loi wu, do tiunu kede gikaber pi lono gikarac.

Marerenu kenu kenu, ikounu woro jo icegun kalamo.

Miunu amara wu bed me ateni, dagunu gikame rac di ikounu moko i kom gikaber.

I tetu butu ka twerere, bedunu i mulem kede jo dedede.

Jo na kame amaro, kur iculunu kwor, do wekunu kare ne lilo ka Rubanga; pien kowandiko be, “Tic me culo kwor en mera, abino culo kwor, Rwot en kowaco.”

Ketunu cunyu nakanaka, tiunu ne Rwot kede cunyu dedede.

Pi kisa kame komia, ango awaco ne ngat acelacel kibutu pi weko paro pi dwongo mere i yore amalo kalamo kite kame mitere ne kede, do pi bedo kede tam aber, ngat acelacel di lubere kede rom me yei kame Rubanga omie.

Kur iculunu raco moro kede raco, do tamunu pi gikaber i wang jo dedede.

Bedunu i anapakin kede ngat acelacel, kur itingerenu do riberenu kede jo kame pirgi likame tek; kur iwakerenu be iriekunu kalamo kite kame itienu kede.

Do tim bala kame kowandiko be, “Ka kec oneko ngakwor ni, mie cam; ka orio oneke, mie pii emati; pien ka itimo kamanono ibino mino lewic make.”

Kwaunu winyo ne jo kame tidilo wu; kwaunu ne gi winyo do kur ilamunu gi. Lelunu karacel kede jo kame lelo, kokunu karacel kede jo kame kok.

Miunu jokacil gikame mitere ne gi, bedunu jo kame gamo jo.

Pien bala kame otienu kede adulion atot i kom wa acel, doko adulion nogo dedede likame timo tic acel, wada otienu kamanono, bed bala ototunu, otienu kom acel i Kirisito, do di ngat acelacel bedo bala adul me kom ngat ocelu.