Popular Bible Verses from Apudunet 2

Share

Sodi kiira Akuj akigoro kech kitam achamunet na achamakin ngesi ka Aburaam, ka Isaka, ta Yakobo. Taanyunga Akuj eger lo aboliare Ngisirael, toliwor itee kesi.

Ani adaunet a ngikaru a ngikaalak, totoan ekapolon a Misiri. Nakaneni aringa Ngisirael eriabasi kotere etich loationon edesikinitae kesi. Egorosi kesi esakete ayuuno. Tanang akigoro kech nia Akuj.

Ani ekisidi epolouni ikoku, toriko ngesi nia nakookeng a ekapolon, tadaka ngina ikoku toliwor lokookeng. Tolim ngesi tama, “Eriuni kolong ayong ngesi anakipi, kotere ngakiro nguna, alimokini ayong ngesi ekiro be Musa.”

Tolimok nakookeng a ekapolon aberu ngina tama, “Tadaka ikoku nikang en kitan, nakaneni ketanyami ayong iyong ngaropiyae.” Sodi tadaka aberu ngina ikoku kitan.

Bu nakookeng a ekapolon a Misiri akilotar anangolol, esaa lo alooso ngakasubak etich keng alokwaas a angolol. Taanyunga ngesi akikap alonyia, tomea akedalan keng alemun.

Ani na apolounio Musa, tolot ngesi aanyun ngitunga keng lu araakasi Ngieburaniae. Taanyunga ngesi eger lo etingakinitere kesi akisub etich loationon. Taanyunga ngesi tani epei a Ngimisiri ibungae Eburaniait lo arai epei a ngitunga a Musa. Tongolengolek Musa ani eyenuni atamar emam itwaan ketee, taar Emisirit sodi kidaik akwaan keng nalup.