Popular Bible Verses from Bar. 8

Share

Khumanyile khuli Wele akholanga bulayi mu biindu bioosi ne nabo babamusiima niye, abo balangilwe khuloondekhana ne sifuno siewe.

Sikila ndi ng'ali ndi se siliio sinyala siakhwaukhasia efwe khukhwama khu busiime bwewe tawe. Se lili lifwa namwe bulamu, malaika namwe babaami babaandi be mwikulu, se bali baliio luno namwe be chindaalo chichiicha, bali mu sibala sie mu ngaaki namwe mu sibala sie aasi, se siliio sisiindu mu bibuumbe bioosi silinyala khukhwaukhasia efwe khukhwama khu busiime bwa Wele buli bubwefwe khubirira mu Yesu Kristo Omwami wefwe tawe.

Mu ngila eyo Roho yesi echanga khukhuyeeta efwe batekhele nga khuli khuri. Sikila se khumanyile nga khukhoyeele khusabe tawe, Roho omwene ekoonjelelanga Wele mu bweyaangu bwefwe mu makhuwa ke khulila kakhanyala kalomalomekha tawe.

Khu kano koosi, khunyala khwaboola siina? Wele aba nali nafwe, naanu onyala waba omusiku wefwe?

Luno likhalakilwa se liliio tawe khwaabo bamenyile mu buambaani ne Yesu Kristo!

Khukhwimeelelwa ne liba lio mundu khureraanga lifwa, khukhwimeelelwa ne Roho khureeranga bulamu ne kumuleembe.

Tawe, mu biindu bino bioosi khuli angaaki we bakhili khubirira mu oyo owakhusiima efwe!

Mbona ndi niko khunyaasibwamo mu siise sia luno sino se kanyala kalekhasibwa na akeekhe ene ne luyali lulikho lwicha khubuulwa khwifwe tawe.

Naanu, nono, onyala akhwaukhasia khukhwama khu busiime bwa Kristo? Kumunaanio kunyala kwakhola kurio, namwe buandalafu, namwe linyaasia, namwe enjala, namwe bubanani, namwe busiku, namwe lifwa?

Mala Wele, obonanga mu miooyo kiefwe, amanyile kamebaasio ka Roho nga kali, sikila Roho ekoonjelelanga Wele khulwe babaandu bewe ne khuloondekhana ne lilienya liewe.

Abo barangirirwa ne Roho owa Wele bali babaana ba Wele.

Kamebaasio kabo bamenyanga nga liba liabwe lio mundu libaboolelanga, kemeelelwa nende niko liba lio mundu lienyanga. Kamebaasio kabo bamenyanga nga Roho nababoolelanga, kemeelelwa nende nisio Roho enyanga.

Wele, okhakhwima Omwana wewe omwene tawe, amuaana sikila efwe fweesi, sanyala akhuelesia bibiindu bioosi nenaye tawe ku?

Ali Roho owa Wele omwene oanaanga buloli ne roho wefwe khuboola khuli efwe khuli babaana ba Wele. Ne sikila khuli babaana bewe, khuliba ne chikhabi nicho abikhila babaandu bewe, ne lundi khulisaanga Kristo mu nibio Wele amubikhila niye, sikila khwaaba ne khusaanga mu binyaasio bia Kristo, khulisaanga akhaba mu luyali lwewe lwosi.

Nono, babaandu bekela basiku ba Wele ne bemeelelwa ne liba liabwe lio mundu, sikila se baria Lilaka lia Wele tawe, mala ng'ali se banyala baliria tawe.

Bibuumbe bioosi bilindiililanga ne lilienya lie silukuluku khulwa Wele khubuula babaana bewe.

Sikila khumanyile khuli khukhwola khu siise sia luno sino, bibuumbe bioosi bililila mu buchuuni, nga omukhasi nasaala omwana.