Popular Bible Verses from Deuteronomio 8

Share

Tsaypa trukanqa tantiyakäriy lapan imaykatapis taripäkunaykipaq TAYTA DIOS yanapashushqaykita. Tsayno yanapaykäshunki unay ayluntsikunawan pactu rurashqanta cumplirmi.

<<Pasaypa muchuycho kawanaykipaq churarkushushpaykipis manátami kamaripäshurqayki mikupäkunaykipaq. Tsay mikuytaqa manami unay ayluntsikuna ni qamkunapis reqipäkurqaykitsu. Tsaynöpami TAYTA DIOS tantiyatsishurqayki kayno nishqanta: <Manami tantata mikulartsu runa kawan, sinöqa TAYTA DIOS lapan nishqankunata cäsukurmi kawan>.

<<Chusku chunka (40) wata chunyaq jirkapa TAYTA DIOS puritsishushqaykita ama qonqapäkuytsu. Tsaychömi nakatsishushpayki probashurqayki. Tsayno rurarqan shonquykicho imata yarpapäkushqaykita musyananpaq y mandamientunkunata cäsukuq o mana cäsukuq kashqaykita musyananpaqmi.

Tsayno kaykaptinqa ama yarpapäkuytsu imaykatapis kikikikunapa kalpaykiwan taripäkushqaykita.

Tsaypita mastapis Moisés kayno nirqan: <<TAYTA DIOSTA ama qonqapäkunkitsu. Kanan junaq wilapashqä mandamientunkunata, leyninkunata y estatütunkunata imaypis mana qonqaypa cumplipäkunki.

Shumaq tantiyakäriy. Tsurinta papänin corrigishqannömi TAYTA DIOS qamkunatapis corrigiykäshunki.

Promitishqan nacionta qoshushqaykicho pacha junta kawarmi TAYTA DIOSTA imaypis alabapäkunki>>.

Tsayno kaykaptinqa TAYTA DIOSPA mandamientunkunata cumplir y pay munashqanno kawar payta mantsakäriy.

Mikupäkunaykipaqpis manáta kamaripäshurqayki. Tsay mikuytaqa manami unay ayluntsikunapis reqipäkurqantsu. Nakatsishushpaykimi probashurqayki tantiyakur ali kawapäkunaykipaq.

Imaykipis mana pishiptin kushishqa kawashpayki, ali wayicho tashpayki, wäkaykikuna, uyshaykikuna, cabraykikuna atskaman miraptin y qoriki, qellayniki y imaykaykikunapis atska kaptin TAYTA DIOSTA ama qonqapäkunkitsu. Paymi Egiptucho ashmay karkaykaptiki jorqamushushqanki.

<<TAYTA DIOS pushaykäshunki raqrakunacho y jalqakunacho atska yakuyuq y atska pukyuyuq nacionmanmi. Tsaychöqa trïgupis, cebädapis, üvapis, hïguspis, granädapis, olïvupis alimi wayun. Tsaynölami olïvupita rurashqa aceitipis y abëjapa mishkinpis atska kaykan. Mikuy tsaytsika kaptinmi muchuypis mana kanqatsu. Qaqakunachöpis fiërrumi kaykan. Puntakunapitapis cobritami jorqapäkunkipaq.

Tsaypita mastapis Moisés kayno nirqan: <<Kanan tantiyatsishqä mandamientukunata cumplipäkunki. Tsayno cumplirmi Abrahamta, Isaacta y Jacobta TAYTA DIOS promitishqan nacionman yaykapäkunki. Tsaychömi atskaman mirar ali kawapäkunkipaq.

<<Chusku chunka wata purirkaykaptikipis röpaykikuna manami ushakarqantsu, ni chakikikunapis manami shuplurqantsu.

Tsaynöpis pushamushurqayki pasaypa mantsakuypaq chunyaq jirkapami. Tsaychömi wanutsikuq culebrakuna y alacrankunapis atska karqan. Upupäkunaykipaq yaku mana kaptinpis qaqapitami pashtatsimurqan.