Popular Bible Verses from Psalms 139

Share

Ninanda manllarina, juyaillagucunata rurashcamandami, candaca alicachisha. Ñucaca, ninandapacha manllarishcami cani. Chaitaca, ñuca almapash alipachami yachan.

Taita Dioslla, ñuca shungutaca imashna cajta ricushpa rijsihuayari. Ñuca yuyaicunatapash, imashna cajta ricushpa rijsihuayari. Ñuca causaipica, jatun nalita rurarcanipashchari, ricuhuayari. Causaita causana ñangupi pushahuayari.

Canmi, ñuca vijsa ucupi tucui tiajcunataca rurarcangui. Ñuca mamapaj vijsapipash, canmi viñachishcangui.

Muyushna chaira viñai callarijujpipash, canga ricujushcanguimi. Tucui chaicunataca, cambaj libropimi escribishca carca. Chai jipaca chaicunataca, shujllatapash na illajtami viñachishcangui.

Mandaj Dioslla, ñuca imashna cajta ricushpami, tucuita rijsihuashcangui.

Cambaj Espiritumandaca, ¿maimanshi risha? Cambaj ñaupajmandaca, ¿maipita pacajugrisha?

Ñuca tiarijtapash, jatarijtapashmi ricuhuashcangui. Ñuca imatalla yarijujtacarin, carumandallatami yachashcangui.

Ricui Mandaj Dioslla, canga ñuca jalluhuan imatapash nara rimajpillatami, ñapash tucuita yachangui.

Ñuca maipi purijujpipash, samajujpipash aligutapachami ricuhuashcangui. Ñuca imashna causajujtapash, tucuitami rijsihuashcangui.