Popular Bible Verses from ISAÍAS 55

Share

Mandaj Diosca, cashnami nin: “Ñuca yuyaicunaca, na cangunapaj yuyaicunashnachu. Ñuca imata rurashpapash, na cangunashna rurashpa causanichu.

Imashnami jahua pachaca, cai pachamandaca jahuaman tiajun, chashnallatami ñuca imata ruranapash yali jatun. Shinallata ñuca yuyaicunapash, cangunapaj yuyaicunataca yali jatunmi.

Mandaj Diostaca, tari ushanalla cajpillata, mascaichiyari. Cangunapaj ladollapi cajpillata, cayaichiyari.

Paita na manllajpash, nali causaitaca saquichun. Nalita ruraj runapash, nali yuyaicunata saquichun. Chaita saquishpa, Mandaj Diospajman tigrarichunlla, paica llaquingami. Ñucanchi Taita Diospajman tigrarichunlla. Paimi, ashtaca ima nalicunata rurashcatapash anchuchinga.

Yacunayachishpa tucui causajcunatami cashna nin: Yacuta ufiangapaj shamuichi. Culquita na charijcunapash, japishpa micuj shamuichi. Ima culquitapash na cushpa vinota, lecheta japij shamuichi.

Tamiapash, rasupash jahua pachamanda urmashpaca, na chaimanllata cutin tigranllu. Ashtahuangarin alpapi jicharishpami, granocunata fucuchin. Tarpuj runaca, paimandami muyuta charin. Paimandami, micungapajpash charin. Ñuca shimimanda llujshij shimicunapash, chashnallatami ñucapajmanga, na chushaj tigramunga. Ashtahuangarin ñuca munashcataca rurangapachami. Ñuca imapaj cachajpipash, tucuimi ali llujshinga.

Huasimandaca, cushijushpami llujshinguichi, shinallata imapash na tucushpa aligutami tigranguichi. Urcucunapash, lomacunapash, cangunapaj ñaupajpimi candanajunga. Sachacunapi tiaj tucui quirucunapash cushijushpami, maquita huactarinajunga.

Cangunapaj rinrita mañachishpa, ñucapajman quimirishpa, aliguta uyahuaichi. Chashna rurajpica, cangunapaj almaca causangami. Cangunahuanga causaita causaicaman llaquisha nishpami, ari nircani. Davidta juyaimandami, chaitapacha rurasha.