Popular Bible Verses from ISAÍAS 41

Share

Na manllanachu canguichi, ñucami cangunahuan cani. Na shaijunachu canguichi, ñucami cangunaman ushaita cuj Taita Dios cani. Imatapash cashcatapacha ruraj, ñuca ali lado maquihuanmi, cangunapaj tucui causaipi ayudajushalla, imatapash carajushalla.

Ashtahuangarin cangunata Mandaj Taita Dios ñucami, cangunapaj ali lado maquimanda pushaj cani. Ñucami cangunataca: ‘Na manllanachu canguichi, ñucami ayudasha’ nini.

Ricuichi, cangunata tucui fiñajcunami pingaichi tucushpa musparinajunga. Cangunahuan fiñanajushpa rimarijcunaca tucuringami. Imapash na tiashcashnami tucunga.

Ñucaca, cangunataca cai pacha tucuri manñacunamandami pushamurcani. Caru llactacunapi cajpimi, cayarcani. ‘Ñucata servijcunamari canguichi’ nircanimi. Canda agllashpaca, napacha shitarcanichu.

Cangunahuan fiñanajushpa rimarijcunataca mascashpapash, na taringuichica. Cangunahuan macanajujcunaca, imapash na tiashcashnami canga.

Israelcunapaj jucha illaj, cangunata Quishpichij Mandaj Diosmi, caitapash nini: ‘Jacobopaj mirai israelcuna, cangunaca jurushnalla cashpapash, huaquinlla cashpapash, na manllanachu canguichi. Ñucami, cangunata ayudaj Dios cani.

“Israelcunalla, cangunaca ñucata servijcunami canguichi. Jacobopaj mirai cangunalla, cangunaca ñucapaj ali cumba Abrahambaj miraicunami canguichi.

Urcucunamandami, jatun yacucunata llujchisha. Pugru pambacunapimi, pugyucunata rurasha. Jichushca pambacunapimi, yacu cuchacunata rurasha. Chaquishca pambacunapipash, yacucuna llujshijujtami rurasha.

Imagupash illaj, llaquilla causajcunaca, yacuta mascanajunmi, yacuca na tianllu. Shinamandami yacunayachishpa, paicunapaj jalluca chaquishca. Ñucami, paicuna mañashcata uyasha. Israelcunapaj Taita Dios ñucaca, paicunataca napacha jichushpa saquishachu.

Caitaca, ¿pita chashna rurashcanga? Callarimandapacha imashnalla canataca, ¿pita churashcanga? Mandaj Dios ñucami, callarimandapacha ricujuni. Jipa miraicaman imata ruranatapash, ñucallatami ricusha” ninmi.

Jichushca pambacunapica, cedro, acacia, arrayán, olivos nishca quirucunatami viñachisha. Chulunlla pambacunapica, ciprés, pino, boje nishca quirucunatami, tandachishpa viñachisha. Chaicunataca, israelcunapaj jucha illaj Mandaj Dios, ñuca maquihuan rurajujta, tucuicuna ricushpa yachanajuchun, entendinajuchunmi chashna rurasha ninimi’ ninmi” nijurcami.