Popular Bible Verses from DEUTERONOMIO 10

Share

Cunanga israelcuna, cangunata Mandaj Taita Diosca, ¿imatata cangunataca mañan? Ashtahuangarin cangunata Mandaj Taita Diosta manllachun, tucui pai mandashcacunata cazushpa causachunmi mañan. Shinallata cangunata Mandaj Taita Diosta tucui shunguhuan, tucui almahuan juyashpa, servishpa causachunmi mañan. Shinallata Mandaj Dios mandashcacunata, pactachinajuchun cushca shimicunata pactachishpa causachunmi mañan. Chaicunataca, canguna tucuipi ali llujshichunmi cunan yachachijuni.

Cangunata Mandaj Taita Diosca, tucui dioscunapaj Taita Diosmi, mandajcunata Mandajmi. Paica, tucuicuna manllana, ninan ushaita charij jatun Taita Diosmi. Paica, na ñavita ricushpalla llaquichij, imatapash pacalla cujpi na japij Diosmi.

Circuncisión nishcata rurashpa, cangunapaj shungumanda asha carata anchuchinshnami causana canguichi. Na ashtahuan shinllicunapacha tucushpa causanachu canguichi.

Paica, taita mama illaj huahuagumambash, sapalla mamagumambash, imatapash cashcatapacha ruraj Diosmi. Shinallata shuj llactamanda shamushca runagumambash, juyashpa micunata, churajunata caraj Diosmi.

Paica, canguna alicachina Diosmi. Paimi, pipash na rurai ushanallacunata, jatun manllarinacunata cangunaman ruraj Taita Dios. Chaicunataca, cangunapaj ñavihuambachami ricurcanguichi.

Cangunata Mandaj Taita Diostami manllana canguichi. Paitallami servishpa causana canguichi. Paitallami catina canguichi. Paipaj shutipillami juramentuna canguichi.

Ricuichi, jahua pachapash, ashtahuan jahuaman jahua pachapash, chaipi tucui imalla tiajcunapash, cai pachapash, cai pachapi imalla tiajcunapash, cangunata Mandaj Taita Diospajmi.

Cangunapash Egipto llactapica, shuj llactamanda rishpami causarcanguichi. Chaimandami, shuj llactamanda shamushca runagutaca juyana canguichi.