Popular Bible Verses from Raom 12

Share

I dunia ke log ke rakam nai bano, lekin Parmeshwar ke tumme badle ke mauka deo. Tab tum jaan lega ki kon kaam Parmeshwar ke khaatir ṭheek hei aur uske pasand ke hei.

Pyaare dosto, Parmeshwar achchha hei. Yahi kaaran ham binti karta hei ki tum aapan deñhi ke jinda bheñṭ, pawitr aur Parmeshwar ke pasand aay waala daan, uske chaṛhaay deo. Parmeshwar ke sewa kare ke waaste yahi sab se jaada samajhdaari ke kaam hei.

Tumhaar aasha tumme khusi rakkhe. Dukh meñ dheeraj rakkho, aur hardam preya karte raho.

Buraai se nai haaro, lekin bhalaai se buraai ke jeet leo.

Ek dusra se bhaiya bahini ke rakam prem karo, aur dusra log ke apne se jaada aadar karo.

Dusra log ke prem kare meñ sinsia raho. Jon cheej bura hei, uske haiṭ karo, aur jon kuchh achchha hei, uske pakṛe raho.

Aur jahañ tak bane sake, sab log ke sañghe saanti se rahna.

E pyaare dosto, badla kabhi nai lena. Lekin Parmeshwar ke badla lewe dena. Baaibal meñ Prabhu bole hei, “Badla lewe ke hamaar kaam hei aur hamahi badla lega.”

Kabhi haar nai maano. Khusi se Pawitr Aatma ke pichchhe laga raho, aur Parmeshwar ke sewa karte raho.

Ham samjhe sakta hei ki Parmeshwar ham pe ketna daya kare hei, aur ham sab se bolta hei ki tum apne aap ke jetna samjhe ke chaahi, usse baṛh ke nai samjho. Lekin jon Parmeshwar biswaas dees hei, wahi ke mutaabik sensibal hoy ke apne aap ke taulo.

Agar koi tumhaar sañghe anyaay karis hei, to uske sañghe anyaay nai karna. Lekin i kosis karna ki uske aadar jeet leo.

Sab ke sañghe frenḍs raho. Kabhi ghamanḍ nai karo, aur log ke i nai dekhaao ki tum ulog se smaat hei. Saadhaaran log se mil jul ke raho.

Baaibal i bhi bole hei, “Agar tumhaar dusman bhuuka hei, to ulog ke kuchh khaay ke deo. Aur agar ulog pyaasa hei, to ulog ke kuchh piye ke deo. Eise kare se ulog ke muuṛ pe jarte añgaar rakkhe ke baraabar hei.”

Parmeshwar se ulog ke waaste aasheesh maañgo jon tumme sataawe hei. Usse bolo ki eisan log ke saraap nai lekin aasheesh dewe. Jab sab log khusi hei, tab ulog ke sañghe khusi raho, aur jab ulog dukh meñ hei, to ulog ke sañghe dukhi raho.

Parmeshwar ke jaruurat mand log ke agar kuchh kamti hei to ulog ke madat karo, aur aapan ghare jagha deo.

Ek deñhi ke bahut hissa hei, aur i sab ke alag alag kaam hei. Wahi rakam ham log ke sañghe bhi hei. Ham to bahut hei, lekin ham sab Maseeh ke deñhi ke hissa hei, aur ek dusra ke hissa bhi hei.