Popular Bible Verses from MATEO 23

Share

Cancunapurapi maijanpish jatun cajca, cancunapajta ruraj cachun.

Maijanpish jatun tucujtaca, pingachishcami canga. Mana jatun tucujtaca, jatunyachishcami canga.

Mandashcacunata quillcajcuna, fariseocuna, mishqui shimi jayaj shungucuna ¡aij cancunalla! Mentata, anista, cominotapish chungamanta shujta cujcunami canguichij. Ashtahuanpish cashcata ruranata, llaquij canata, crinatapish, chai ashtahuan alli Mandashcatarajmari saquishcanguichij. Diosman cunatapish mana saquishpami, chai Mandashcacunataraj rurana carcanguichij.

Mandashcacunata quillcajcuna, fariseocuna, mishqui shimi jayaj shungucuna ¡aij cancunalla! Vasotapish, platotapish jahuallatami maillanguichij. Ashtahuanpish ucu shunguca shuhuana yuyaihuan, imatapish mana allita rurana yuyaihuan jundami canguichij.

¡Jerusalenpi causajcunalla, Jerusalenpi causajcunalla cancunaca profetacunata huañuchijcuna, Dios cachashca huillajcunata rumihuan shitajcunapishmi canguichij! ¡Tauca cutinmi mama atillpa paipaj huahuacunata alas ucupi ugllaj shina tandachisha nircani! Ashtahuanpish mana uyarcanguichijchu.

Shinallatajmi cancunapish canllata ricujpica, cashcata rurajcuna shina shujtajcunapica ricuringuichij. Ashtahuanpish ucu shunguca jayacuj, millaita ruranahuan jundami canguichij.